सोसल मिडिया
रुकुम पश्चिम / प्रेस सेन्टर नेपाल रुकुम पश्चिमले जिल्लाका ६ वटै पालिकामा संगठन विस्तार गरेको छ ।
सेन्टरको केन्द्रिय सर्कुलर अनुसार र जिल्लामा असोज २४ गते बसेको जिल्ला समितिको निर्णय अनुसार जिल्लाका सबै पालिकामा संगठन विस्तार गरिएको हो ।जिल्लाको निर्णय अनुसार प्रेस सेन्टरले चौरजहारी नगरपालिकाबाट सुरु गरेको संगठन विस्तार आज आठबिसकोट नगरपालिकामा कमिटी गठन गरे सङ्गै सबै पालिकामा गठन सम्पन्न भएको हो ।
प्रेस सेन्टर नेपाल जिल्ला सम्मेलन आयोजक समिति रुकुम पश्चिमका संयोजक मेगराज खड्काका अनुसार चौरजहारी नगरपालिकामा तिलक ओलिको अध्यक्षतामा १९ सदस्यीय कमिटी गठन गरिएको छ भने मुसिकोट नगरपालिकामा दिपेन्द्र महतराको अध्यक्षतामा १५ सदस्यीय कमिटी गठन गरिएको छ ।
यसैगरी त्रिवेणि गाउँपालिकामा कुबेर ओलिको अध्यक्षतामा १३ सदस्यीय ,सानोभेरी गाउँपालिकामा छबिलाल बिष्टको अध्यक्षता १३ सदस्यीय, बाफिकोट गाउँपालिकामा प्रचण्ड खत्रीको अध्यक्षतामा ११ सदस्यीय र आठबिसकोट नगरपालिकामा सत्य बटालाको अध्यक्षतामा १३ सदस्यीय कमिटी गठन गरिएको छ ।
संभवत सबै पालिकाहरुमा संगठनको विस्तार गर्ने रुकुम पश्चिम पहिलो जिल्ला नै बनेको संयोजक खड्काको भनाई छ । प्रेस सेन्टर नेपाल रुकुम पश्चिमको जिल्ला अधिबेशन यहि कार्तिक १३ गते सदरमुकाम खलंगामा हुने संयोजक खड्काले बताउनुभयो ।
