रुकुम पश्चिमको चौरजहारी नगरपालिकाले बस्ती तथा टोलसम्म पुगेर ५५ वर्ष माथिका नागरिकहरूको स्वास्थ्य परीक्षण शिविर सम्पन्न गरेको छ ।

रोगको अवस्था पहिचान गरी उपचारको प्रबन्ध मिलाउन नागरिक स्वास्थ्य परीक्षण शिविर सञ्चालन गरिएको हो । शिविरमा दुई हजार ७२२ जनाको स्वास्थ्य परीक्षण गरिएको चौरजहारी नगरपालिकाका निमित्त प्रमुख प्रशासकिय अधिकृत शेरप्रसाद ढकालले जानकारी दिनुभयो । 

उहाँका अनुसार स्वास्थ्य परीक्षण गरिएका मध्ये २७५ जनामा उच्च रक्तचाप र दुई सय जनामा मधुमेहको समस्या देखिएको छ । त्यसैगरी १८९ जनामा मृगौला सम्बन्धी समस्या र १७० जनामा दमसम्बन्धी समस्या देखिएको छ । बाँकीको स्वास्थ्य अवस्था भने सामान्य देखिएको छ । 

समस्या देखिएका बिरामीहरूलाई आवश्यक परामर्श, उपचार तथा प्रेषण गरिएको छ । स्वास्थ्य परीक्षणका लागि  नगरपालिका अन्तर्गतका सबै स्वास्थ्य संस्थाहरू २०८० चैत्र २७ गतेदेखि एक साताका लागि परिचालन गरिएको थियो ।

नगरपालिका क्षेत्रभित्रका ५५ वर्षमाथिका उमेर समूहका तीन हजार ३८७ जना रहेको तथ्याङ्क भएतापनि ८०.३ प्रतिशतले मात्रै शिविरमा स्वास्थ्य परीक्षण गराइएको निमित्त प्रमुख प्रशासकिय अधिकृत ढकालले बताउनुभयो ।

कतिपय रोजगारीको सिलसिलामा बाहिर रहेको, कतिपयको मृत्यु भएको तथा कामकाजको कारण बाहिर रहेकोले पनि सतप्रतिशतको स्वास्थ्य परीक्षण गर्न नसकिएको बताईएको छ । 

स्वास्थ्य सेवाको पहुँच घरदैलोसम्म पुर्याउन तथा स्वास्थ्य सम्बन्धी मौलिक हक कार्यान्वनयको अनुभूति दिलाउन स्वास्थ्य परीक्षण कार्यक्रम महत्त्वपूर्ण रहेको नगरपालिकाले जनाएको छ ।