सोसल मिडिया
सल्यान / राप्ती राजमार्ग अन्तर्गत सल्यानको कपुरकोटमा आईतबार बिहान जीप दुर्घटना भएको छ । दुर्घटनामा परी एक जनाको मृत्यु भएको छ भने ५ जना घाईते भएका छन् ।
जिल्लाको कपुरकोट गाउँपालिका वडा नम्वर ३ मुलपानीमा भे १ च १२८० नम्वरको डबल क्याप जिप दुर्घटना भएको जिल्ला प्रहरी कार्यालय सल्यानले जनाएको छ । दुर्घटनामा परी सल्यानको बागचौर नगरपालिका १ का १८ बर्षिय आयुष बस्नेतको उपचारको क्रममा दांग लिदै गर्दा मृत्यु भएको छ ।
सल्यानको थारमारेबाट दांग तर्फ जाँदै गरेको जिप आज बिहान ८ बजे दुर्घटना भएको हो । जिप सडकबाट अन्दाजी १ सय मिटर तल खसेको प्रहरीले जनाएको छ ।
दुर्घटनामा परेर अन्य पाँच जना घाईते भएका छन् । घाईते हुनेहरुमा सल्यानको बागचौर नगरपालिका १ का मनोज बस्नेत, सोहि ठाउँका सीता ओली, बबिता रावल र निजको ११ बर्षकी छोरी एलिसा रेउले रहेका छन् ।
एक जना घाईते पुरुषको नामथर र वतन नखुलेको प्रहरीले जनाएको छ । उनी बेहोस् अवस्थामा रहेका छन् ।
घाईते मध्य बबिता रावलको अवस्था गम्भिर भएपछि नेपालगंज लगिएको छ भने अन्यलाई उपचारको लागि दांग पठाईएको सल्यान प्रहरीले जनाएको छ ।
गाडि चालकको पहिचान हुन नसकेको जनाईएको छ ।
