सोसल मिडिया
रुकुम पश्चिम / जिल्लामा हाल सञ्चालित बिभिन्न ईन्टरनेट सेवा प्रदायक निकायको सेवा 'झुर' भएको अधिकांश प्रयोगकर्ता ग्राहकहरुको गुनासो रहेको छ । कमजोर इन्टरनेट सेवाको कारण विभिन्न कामहरु प्रभावित भएको भन्दै ग्राहकहरुले सार्वजनिक रुपमा गुनासा गरिरहेका छन् ।
अहिले जिल्लामा नेपाल टेलिकमको एडिएसएलका साथै इन्टरनेट सेवाप्रदाय सस्था वर्डलिंक, एभरेष्ट, सुबिसु लगायतले सेवा दिईरहेका छन् । यी सेवाहरु प्रभावकारी नभएको तथा कमजोर गतिमा रहेको गुनासाहरु प्राय आईरहन्छन् । नेपाल टेलिकम र एनसेलको मोबाईल सिमबाट डाटा लिएर पनि इन्टरनेट चलाउने गरिएको छ । डाटा प्याकले पनि गुणस्तरिय नभएको र पैसा मात्र काट्ने गरेको बताईन्छ ।
प्रभावकारी इन्टरनेट सेवा नभएको गुनासो बढिरहेको बेला रुकुम पश्चिममा अब छिट्टै अपटिकल फाईबर सेवा सुचारु हुने भएको छ ।
त्यसको लागि नेपाल टेलिकमले रुकुम पश्चिमको सदरमुकाम सम्म अप्टिकल फाईबर सेवा जडानको लागि टेण्डर आह्वान भएको जानकारी दिएको छ ।
नेपाल टेलिकमको प्रादेशिक निर्देशनालय सुर्खेत, सम्पर्क कार्यालय नेपालगञ्जका प्राविधिक प्रमुख शिव खनालले रुकुम पश्चिम सम्म अप्टिकल फाईबर जडानको लागि केन्द्रबाटै टेण्डर आह्वान भएर आवश्यक प्रक्रियामा गैसकेको जानकारी दिनुभयो ।
मूलपाटीसँगको कुराकानीको क्रममा उहाँले फाईबर जडान भैसकेपछि चाँडै नै सेवा सुरु हुने बताउँनुभयो । ‘टेण्डर आह्वान भएर प्रक्रियामा गैसकेको छ,’ खनालले भन्नुभयो ‘प्राविधिक काम भएकोले यति दिनमा हुन्छ त भन्न सकिन्न, तर छिट्टै हुन्छ ।’
हाल सम्म सल्यानको श्रीनगर सम्म अप्टिकल फाईबर जडान भैसकेको छ ।
अप्टिकल फाईबर जडान पश्चात सेवा सुचारु भएमा नेट स्लो हुने, अवरोध हुने, ग्राहकका गुनासाहरु समेत समाधान हुने विश्वास रहेको नेपाल टेलिकम दुर संचार कार्यालय रुकुम पश्चिमका प्रमुख कृणप्रसाद शर्माले बताउनुभयो ।
