सोसल मिडिया
राप्ती राजमार्ग अन्तर्गतको रुकुम पश्चिम खण्ड अबरुद्ध भएको छ । राजमार्गको मुसीकोट नगरपालिका ११ र १२ स्थित पितिबाङ खोलामा आएको बाढीको कारण राजमार्ग अवरुद्ध भएको हो ।
शनिबार दिउँसो आएको पानीको कारण खोलामा बाढी आएपछि खोलामा राखिएका ह्युम पाइप बगाएको र राजमार्ग अवरुद्ध भएको मुसिकोट नगरपालिका वडा नम्वर १२ का वडा अध्यक्ष धिरण सिर्पालीले जानकारी दिनुभयो ।
उहाँका अनुसार खोलामा आएको ठुलो बाढी र ह्युम पाईप बगाएपछि यातायातका साधानहरु रोकिएका छन् । रुकुम पूर्वको रुकुमकोट, रुकुम पश्चिमको जिल्ला सदरमुकाम मुसिकोटबाट राप्ती राजमार्ग हुँदै सल्यान, दाङ, नेपालगञ्ज र काठमाडौं जाने सवारी साधनहरु शनिबार बेलुकादेखि अवरुद्ध भएका छन् ।
यसका साथै स्थानीयस्तरमा सञ्चालन हुने सवारी साधनहरु समेत अवरुद्ध रहेको वडा अध्यक्ष सिर्पालीले जानकारी दिनुभयो । यातायात अवरुद्ध भएपछि सयौ यात्रु तथा सर्वसाधारणहरुले सास्ती खेप्नु परेको छ ।
डिभिजन सडक कार्यालय चौरजहारीका प्रमुख तेजस्वी शर्माले अहिले पनि बाढी ठुलो मात्रामा रहेकोले तत्कालको लागि डाईभर्सन गर्ने काम भईरहेको जानकारी दिनुभयो । खोलामा पानीको मात्रा कम भएपछि आजै करिब एक दर्जन ह्युम पाइप राखेर यातायात सञ्चालनमा सहजता ल्याउने शर्माले बताउनुभयो । अहिले खोलामा स्काईभेटरको प्रयोग मार्फत डाईभर्सनको काम भईरहेको छ ।
पुल निर्माण अलपत्र
यस खोलामा पुल निर्माणको काम सुरु भएतापनि अहिले अलपत्र अवस्थामा रहेको छ । २०७८ बैशाख ७ गतेसम्म पुल निर्माण गर्नेगरी संरक्षण निर्माण सेवा प्रालि र डिभिजन सडक कार्यालय चौरजहारी बिच २०७६ असार ८ गते कार्य सम्झौता भएको थियो ।
मूल्य अभिवृद्ध कर बाहेक चार करोड १२ लाख ३९ हजार ३७५ निर्माण लागत रहेको उक्त पुल ४ वर्षदेखि अलपत्र अवस्थामा छोडिएको छ । पुल नबन्दा पैदल यात्रुहरु, यात्रुवाहक सवारी साधनहरु, उद्योगी व्यवसायीका मालवाहक गाडीहरु, बिरामी बोकेका एम्बुलेन्सहरुले सास्ती पाइरहेका छन् ।
ठेकेदारको लापरबाहिको कारण पुल निर्माणको काम अवरुद्ध भएको भन्दै स्थानीयस्तरमा चर्को बिरोध हुने गरेको छ । डिभिजन सडक कार्यालयले ठेकेदार कम्पनीसँग ठेक्का सम्झौता तोड्ने तयारी भईरहेको जनाएको छ ।
