रुकुम पश्चिमबाट प्रशारित सामुदायिक रेडियो समावेशी आवाज पहिलो वर्ष पूरा गरी दोस्रो वर्षमा प्रवेश गरेको छ । उत्तरगंगा सञ्चार केन्द्रद्धारा सञ्चालित सामुदायीक रेडियो समावेशी आवाज १०२ मेगार्हज आजबाट पहिलो वर्ष पूरा गरी दोस्रो वर्षमा प्रवेश गरेको हो । 

वार्षिकोत्सवको अवसरमा रेडियोका स्टेशन प्रमुख गोपाल ओली र उत्तरगंगा सञ्चार केन्द्रका अध्यक्ष राजेन्द्र पुनले संयुक्त रुपमा शुभकामना सन्देशसहितको विज्ञप्ति गर्नुभएको छ । विज्ञप्तीमा आम श्रोता, स्थानीय सरकार, विज्ञापनदाता, सहयोगी संघ संस्था, रेडियोमा कार्यरत कर्मचारी तथा पत्रकारहरुलाई शुभकामना व्यक्त गरिएको छ । 

बिज्ञप्तिमा संघीयता कार्यान्वयन, सुशासन बहाली लगायत सहि र तथ्य सूचना प्रवाहका साथै रेडियोका माध्यमबाट सचेतनाका कार्यक्रमहरु सञ्चालन गर्ने प्रतिबद्धता गरिएको छ । सकारात्मक कामहरुको प्रचार र अनियमितताको भण्डाफोर गर्ने अभियानलाई पनि निरन्तरता दिईने उल्लेख गरिएको छ । 

यस साथै समाजिक परिर्वतन, स्थानीय मौलिक कला संस्कृतिको जर्गेना, स्थानीय प्रतिभाहरुको प्रष्फुटन, जनहितकारी सन्देश तथा सूचना प्रवाह जस्ता कार्यहरु निरन्तर रुपमा अगाडि बढाउने जनाईएको छ । 

पाँच सय किलोवाट क्षमताको यो रेडियोले इजाजत प्राप्त गरेर २०८० जेठ ४ गतेदेखि आधिकारीक रुपमा प्रशारणमा आएको थियो ।

गत कार्तिक १७ गते जाजरकोट केन्द्रबिन्दु भएर गएको भूकम्पको कारण रेडियो समावेशी आवाजको भवन पूर्ण रुपमा क्षति भएको थियो । त्यसबेला पनि जनतालाई सूचना दिनकै लागि त्रिपाल तथा टेन्टबाटै भएपनि रेडियोले सेवालाई निरन्तरता दिएको थियो ।