रुकुम पश्चिमको आठविसकोट नगरपालिका –४ स्थित इन्द्रज्योति आधारभूत विद्यालयको छाना निर्माण गरिएको छ ।

गत चैत १७ गते आएको हावाहुरीको कारण उडाएको छाना डेढ महिनापछि निर्माण भएको हो । छाना मर्मतपछि बालबालिकाहरु कक्षाकोठामै राखेर पठाउन थालिएको छ । 

विद्यालयको जस्तापाताको छाना हावाहुरीले उडाएपछि यस विद्यालयमा अध्यननरत बालबालिकाहरु रुखको छहारीमा बसेर पढ्दै आएका थिए । यस बिषयमा मूलपाटी डटकममा वैशाख ३ गते 'विद्यालयको छाना नभएपछि रुखको छहारी बन्यो कक्षाकोठा' शिर्षकमा समाचार प्रकाशन भएको थियो । 

समाचार प्रकाशनपछि आठविसकोट नगरपालिकाको सहयोगमा भवन मर्मत गरिएको हो । विद्यालयका प्रधानाध्यापक कल्पना बि.एम. बिष्टले आईतबारदेखि बिद्यार्थीहरुलाई कक्षाकोठामै बसाएर पठनपाठन सुरु गरिएको बताउनुभयो । बाल शिक्षादेखि कक्षा २ सम्म पढाई हुने यस विद्यालयमा ४० जना छात्रा र ३५ जना छात्र रहेर ७५ जना बिद्यार्थीहरु रहेका छन् । 

हावाहुरीले विद्यालयको छाना उडाएपछि भवन लथालिङ्ग बनेको थियो । बिद्यार्थीहरुलाई घाम लाग्दा रुखमुनिको छहारीमा राखेर पढाउनुपर्ने बाध्यता रहेको थियो । उक्त बाध्यता अन्त्य भएको प्रधानाध्यपक बिष्टले जनाउनुभयो । उहाँले भन्नुभयो, ‘रुखको छाया जताजता सर्छ, उतै बिद्यार्थीहरु सारेर पढाउनुपर्ने अवस्था थियो, आजदेखि कक्षाकोठामै पढाइ भईरहेको छ ।’

विद्यालयको तीन कोठे उक्त भवन मर्मतपछि कार्यालय समेत सोहि भवनमा सारिएको छ । यस अघि स्थानीयको टहरामा कार्यालयका सामाग्रीहरु थन्काईएको थियो । छाना मर्मतपछि सबै सामान सारेर विद्यालय भवनबाटै प्रशासकिन कार्य सुरु गरिएको छ । भवन मर्मतका लागि सहयोग गर्ने आठविसकोट नगरपालिकालाई प्रधानाध्यापक बिष्टले धन्यबाद ब्यत्तिल गर्नुभयो । 

कक्षाकोठामै बसेर पढ्न पाउँदा बालबालिकाहरु खुशि भएका छन् । कक्षा २ मा अध्ययनरत छात्रा बिमला सार्कीले कक्षामै बसेर पढ्न पाउँदा आनन्द लागेको बताईन् । कक्षाकोठा नुहँदा रुखको छहारी खोज्दै सर्नुपर्ने, पानी परेपछि घर जान हतार गर्नुपर्ने अवस्था नभएपछि खुशी लागेको सार्कीको भनाई छ ।

कक्षा १ मा अध्ययनरत छात्र भैरव बिष्टले कक्षाकोठामा बसेर पढ्न पाउँदा घाम र पानीको डर नहुँने बताए । पहिला चौरमा, रुखको छहारीमा बस्नुपर्दा कापीकलम हराउने डर समेत रहेको उनले सुनाए । अब भने कक्षाकोठामा निर्धक्क भएर पढ्ने उनको भनाई छ । 

आठविसकोट नगरपालिकाले उक्त विद्यालयको भवन मर्मतको लागि सहयोग गरेको हो । मर्मतका लागि ५६ वटा जस्तापाता, पाँच बोरा सिमेन्ट, एक ट्याक्टर वालुवा, २० बोरा गिठ्ठी र मिस्त्री खर्च लागेको छ । ५१ वटा जस्तापाता नगरपालिकाले खरिद गरेर पठाईदिएको र अन्य खर्च पनि नगरपालिकाले बेहोर्ने बताईएको छ ।