सोसल मिडिया
भेरी करिडोर अन्तर्गत रुकुम पश्चिमको आठबीसकोट नगरपालिका –४ छरेबगर र जाजरकोटको नलगाड नगरपालिका –१२ जोड्ने भेरीनदी माथि बनेको तल्लुबगरको ‘बेलिब्रिज’ औपचारिक रुपमा उद्घाटन भएको छ ।
बुधबार पूर्व अर्थमन्त्री एवम् प्रतिनिधि सभा सदस्य जनार्दन शर्माले रिबन काटेर ‘बेलिब्रिज’ को उद्घाटन गर्नुभएको हो ।
उद्घाटन कार्यक्रममा पूर्वमन्त्री शर्माले यो सडकलाई रुकुम पश्चिम, जाजरकोट र डोल्पाको लाईफलाईनका रुपमा लिईएको बताउभयो । उहाँले यो करिडोरले भारतको रुपैडियादेखि नेपालगञ्ज हुँदै चीनको सीमाक्षेत्र मोरिम्ला नाका जोड्ने भएकाले यस सडकलाई राष्ट्रिय महत्वको सडकको रुपमा समेत लिईएको उल्लेख गर्नुभयो ।
यस क्षेत्रका जनताले सडकको सहज सुविधामा जोडिदै गएको र अब स्थानीय रुपमा उत्पादनहरुलाई निर्यात गरेर आर्थिक मुनाफा लिन सकिने उहाँको भनाई छ ।
हालै सम्पन्न भएको उक्त बेलिब्रिजको गत शुक्रबार भेरी करिडोर कार्यालयको प्राविधिक टोलीले भारवाहन क्षमता परीक्षण गर्दा सफल भएको थियो । त्यसपछि शनिबारबाट बेलिब्रिज सञ्चालनमा आएको थियो । बेलिब्रिजले २५ टनसम्म भार थेग्नसक्ने बताईन्छ ।
भेरी करिडोरलाई त्रिदेशीय व्यापारिक सडकको प्रमुख पूर्वाधारका रुपमा लिईन्छ । भेरी करिडोर कार्यालय जाजरकोटका प्रमुख सुनिल रञ्जितकारले भारत–नेपाल हुँदै चीन जोड्ने भेरी करिडोर अन्तर्गत तल्लुबगर बेलिब्रिज सञ्चालनमा आएसँगै अब डोल्पा जिल्ला सिधा सडक सञ्जाल जोडिएको बताउनुभयो ।
तीन वर्षअघि सडक डिभिजन कार्यालय चौरजहारीले उक्त बेलिब्रिज निर्माणका लागि ठेक्का खुलाएको थियो । काम सुरु भएको तीन वर्षपछि बेलिब्रिज सञ्चालनमा आएको हो । २०७८ पुसमा हिम सगरमाथा खड्का कृष्ण जेभीले तीन करोड ८१ लाख रुपियाँमा ‘बेलिब्रिज’ निर्माणको ठेक्का पाएको थियो । विविध कारणले ‘बेलिब्रिज’ निर्माणमा ढिलासुस्ती भए पनि अहिले निर्माण सम्पन्न भइ सञ्चालनमा आएको हो ।
गत वर्षको बैशाख ७ गते यहि बेलिब्रिज निर्माणको क्रममा भाँचिएपछि दुई जना कामदारको मृत्यु भएको थियो भने सात जना घाईते हुनुभएको थियो ।
करिडोरअन्तर्गत तल्लुबगर, नलगाड र खदाङमा पक्की पुल निर्माण सुरु भएको बताईएको छ । अन्य खोलाहरुमा ह्युमपाइप राखेर डोल्पासम्म सिधा यातायात सञ्चालन गरिने तयारी भईरहेको छ ।
