रुकुम पश्चिमको बाँफिकोट गाउँपालिका –२ मा १७८ मिटर लामो सिंचाई नहर निर्माण भएको छ । नहर निर्माण भएपछि यहाँका किसानहरु खुशी भएका छन् । 

वडामा रहेको पुमा सिंचाई नहरको काम पुरा भएपछि खेतीयोग्य जमिनमा सिंचाई सुविधा पुगेको भन्दै किसानहरु खुशी भएका हुन् । स्थानीय किसान यामबहादुर खत्रीले पक्की नहर निर्माण भएपछि व्यवस्थित रुपमा सिंचाई हुने बताउनुभयो । नहर निर्माण भएर सिंचाईको पानी समेत सुचारु भएको बताउँनुहुँदै खत्रीले यस क्षेत्रमा खाद्यन्न तथा तरकारी खेतीका लागि नहरको पानी उपयोग हुने जनाउनुभयो ।

अर्का किसान टोप बहादुर पौडेलले नहर निर्माणपछि पुमा देखि तल्लाबगर हुँदै खोपीगाउँ सम्मका किसानहरु खुशी भएको उल्लेख गर्नुभयो । यसअघि कच्चि कुलोबाट खेतियोग्य जमिनसम्म सिंचाईको लागि पानी ल्याउन मुश्किल हुने गरेको र अब सहज हुने पौडेलले बताउनुभयो । किसानहरुको मर्कालाई मध्यनजर गरेर वडा कार्यालयले नहर निर्माणको लागि महत्वपूर्ण पहलकदमी लिएको उहाँको भनाई छ । 

यो सिंचाई नहरले मुख्य गरेर यस क्षेत्रको धान उत्पादन हुने क्षेत्र सिंचित हुने बताईएको छ । वडा अध्यक्ष प्रकाश खत्रीले यस नहरबाट वडाका करिब पाँच सय घरधुरी लाभान्वित हुने जानकारी दिनुभयो । खानेपानी, सिंचाई तथा उर्जा विकास कार्यालयको २५ लाख लागतमा धमधमे छहरा र पुमा सिंचाई नहर निर्माणको काम सुरु गरिएको थियो ।

पुमा सिंचाई नहरको काम सम्पन्न भएर पानी सञ्चालन भईसकेको र धमधमे छहराको काम अन्तिम चरणमा रहेको वडा अध्यक्ष खत्रीले जनाउनुभयो । 
नहर निर्माण हुनुअघि परम्परागत कुलोबाट सिंचाई हुने गरेको थियो । तर सिंचाई अपर्याप्त हुने र असहज भएपछि किसानहरुको समस्या समाधान गर्न वडा कार्यालयको पहलमा नहर निर्माणको योजना परेको थियो ।