रुकुम पश्चिमको आठविसकोट नगरपालिका भित्रका २१ विद्यालयहरुलाई डेस्क र बेन्च हस्तान्तरण गरिएको छ । भूकम्प प्रभावित क्षेत्रका बालबालिकाहरुको सिकाइ निरन्तरताको लागि सुविधायोग्य डेस्क तथा बेन्च हस्तान्तरण गरिएको हो । 

ललितपुरस्थित नेपाल जेईतुस सामाजिक संस्था र बाँकेको कोहलपुरस्थित जीवन ज्योती संस्थाले डेस्क र बेन्च उपलब्ध गराएका हुन् । आठविसकोट नगरपालिका प्रमुख रबि केसीले २१ विद्यालयलाई ४२० सेट डेस्क र बेन्च सहयोग प्राप्त भएको बताउनुभयो । जेईटुसका निर्देशक रोय सेवस्टेन र जीवन ज्योतीका निर्देशक जोमन जेम्ससहितको टोली विद्यालयमा पुगेर उक्त सामाग्रीहरु उपलब्ध गराएको हो । 

निर्देशकद्वयसहित आएको प्राविधिकहरुको टोलीले २१ वटै विद्यालयमा पुगेर डेस्क र बेन्च जडान समेत गरेको छ । सुविधायोग्य डेस्क र बेन्चले बालबालिकाको कक्षाकोठाको बसाई, किताब तथा कापी सुरक्षित व्यवस्थापनमा टेवा पुग्ने नगर प्रमुख केसीले बताउनुभयो । यसका साथै सिकाइमैत्री वातावरण निर्माणमा समेत सघाउ पुग्ने विश्वास गरिएको छ । 

भूकम्पले क्षती गरेका यहाँका विद्यालयहरु भने पुनर्निर्माणको पर्खाईमा रहेका छन् । आठविसकोट नगरपालिकाका शिक्षा शाखाका अनुसार गत कात्तिक १७ गतेको भूकम्पको कारण यहाँका ६४ विद्यालयमा क्षति पुगेको छ । यी मध्य ५४ वटा सामुदायिक विद्यालय पूर्ण रुपमा क्षती भएका छन् भने १० वटामा आंशिक क्षती भएको शिक्षा अधिकृत ईन्द्रबहादुर बिष्टले जानकारी दिनुभयो ।

आठविसकोटमा अहिले २२ वटा सिकाई केन्द्र बनेका छन् भने १० वटा निर्माणाधिन रहेका छन् । तत्काल ५९ वटा अस्थायी सिकाइ केन्द्र आवश्यक रहेको शिक्षा अधिकृत बिष्टले उल्लेख गर्नुभयो ।