रुकुम पश्चिमको चौरजहारी नगरपालिकाले अन्तरजातिय विवाह गर्ने एक जोडिलाई सम्मान गरेको छ । नरपालिकाको १९ औ नगरसभाको अवसरमा एक लाख नगदसहित एक जोडिलाई सम्मान गरिएको हो । 

चौरजहारी नगरपालिका –२ निवासी लोकेन्द्र परियार र रोल्पाको परिवर्तन गाउँपालिका –३ निवासी खुमा के.सी.लाई नगदसहित सम्मान गरिएको हो । नगरपालिकाले ल्याएको अन्तरजातिय विवाह गर्ने जोडिहरुलाई सम्मान गर्ने कार्यक्रम अन्तर्गत उहाँहरुलाई सम्मान गरिएको नगर प्रमुख पुष्प वादीले जानकारी दिनुभयो । 

उहाँका अनुसार अन्तरजातिय विवाह गरी सामाजिक साँस्कृतिक रुपान्तरणका लागि प्रशंसनिय एवम् अनुकरणीय कार्य गरेकोले उहाँहरुलाई सम्मान गरिएको हो । उहाँहरुले परिवर्तनशील एवम् विभेदजन्य कुसंस्कार अन्त्यको लागि चालेको कदमको उच्च प्रंशसा गर्दै प्रोत्साहन स्वरुप सम्मान गरिएको हो ।  

उहाँहरुलाई नगद, सम्मानपत्र, दोसल्ला र अबिरसहित नगर प्रमुख पुष्प वादी, उपप्रमुख ईश्वरी शर्मा बिएम र निमित्त प्रमुख प्रशासकिय अधिकृत शेर प्रसाद ढकालले सम्मान गर्नुभएको हो । 

गत वर्षदेखि नगरपालिकाले यो कार्यक्रम गर्दै आएको छ । गत वर्ष अन्तरजातिय विवाह गर्ने दुई जोडिलाई सम्मान गरिएको थियो ।