सोसल मिडिया
पहिरोको कारण अवरुद्ध रहेको मध्यपहाडी राजमार्गको रुकुमखण्डमा यातायात सुचारु भएको छ । गत शनिबार बेलुका मुसीकोट नगरपालिका –८ किटेनीमा आएको पहिरोले अवरुद्ध बनेको राजमार्गको पहिरो हटाएपछि सोमबार दिउँसोबाट यातायातका साधनहरु चलेका छन् ।
रुकुम पश्चिमका प्रमुख जिल्ला अधिकारी हरि प्रसाद पन्तका अनुसार मध्यपहाडि राजमार्ग कार्यालयसँग समन्वय गरेर पहिरो हटाईएको हो ।
मध्यपहाडि राजमार्ग कार्यालयले यस स्थानमा अवरुद्ध रहेका सडक सूचारु राख्नको लागि आवश्यक सामाग्री समयमै उपलब्ध गराउन नसक्दा तीन दिनपछि राजमार्ग खुलेको हो । पहिरो पन्छाउनको लागि राजमार्ग कार्यालयले सोमबार बिहान मात्र स्टाभेटरको व्यवस्था गर्न सकेको थियो ।
किटेनीसँगै रुकुम पश्चिमको चौरजहारी नगरपालिका –८ स्थित कालेखोलामा पनि पहिरो आएको थियो । दुबै स्थानको पहिरो पन्छाईएको कार्यालयले जनाएको छ ।
यसका साथै रुकुम पूर्वको रुकुमकोट स्थित रानीकोटमा समेत गएरातीको पानीको कारण पहिरो आएको थियो । यस स्थानमा पहिरो पन्छाएर एकतर्फी रुपमा यातायातका साधानहरु चल्ने व्यवस्था मिलाईएको छ ।
सडक अवरुद्ध हुँदा रुकुमपश्चिम हुँदै रुकुमपुर्व, पोखरा, काठमाडौँ जाने र रुकुमपुर्वबाट पनि रुकुमपश्चिम, सल्यान, दाङ, नेपालगन्ज जाने सवारी साधनहरु रोकिएका थिए ।
