डोल्पाको सदरमुकाम दुनैबाट नेपालगञ्जका लागि छुटेको रात्री बस मङगलबार छलगाड खोलामा आएको बाढीमा फसेको छ । ना ख १७९८ नम्वरको यात्रुबहाक बस डोल्पाको त्रिपुरासुन्दरी नगरपालिका –१ स्थित छलगाड खोलामा आएको बाढीमा फसेको हो । 

त्रिपुराकोट प्रहरी चौकीका प्रहरी नायब निरीक्षक रमेश बहादुर सिंहले दिनुभएको जानकारी अनुसार ३४ जना यात्रु, खसीबोका र खाद्यसामाग्री बोकेको बस खोलामा फसेको हो । गाडि खोलामा अड्किए लगत्तै प्रहरी र स्थानीय मिलेर सबै यात्रुहरुको सकुशल उद्धार गरेको उहाँले बताउनुभयो । उहाँका अनुसार गाडिमा ३४ जना यात्रुहरु रहेका थिए ।

गाडिको पछाडिको डिक्कीमा रहेको एक वटा खसी, तीन बोरा दाल, छतमा रहेका ५० थान तरकारीका क्यारेट र यात्रुका केहि झोलाहरु भने खोलाले बगाएको उहाँले बताउनुभयो ।

सुरुमा पानीको बहाव कम भएकोले चालकले खोलामा गाडि हालेको तर माथिल्लो लेकतर्फबाट एक्कासी ढुङ्गा, माटोसहितको बाढी आउँदा गाडि फसेको उहाँको जनाउनुभयो । खोलामा पानीको बहाव धेरै भएकोले गाडिलाई बगाउनबाट जोगाउन बलियो डोरीले खोला किनारको ढुङ्गामा बाँधिएको समेत सिंहले जानकारी दिनुभयो । 

उक्त स्थानमा सोमबार पनि सोहि गाडि फसेको थियो । जेसिबीको प्रयोग मार्फत तानिएको गाडि नेपालगञ्जतर्फ यात्रु लिएर फर्कदै गर्दा फसेको हो । आज रातभर गाडि खोलामै रहने र पानीको बहाव कम भएमा जेसिबी प्रयोग गरेर निकालिने बताईएको छ । 

गाडि फसेपछि यात्रुहरु अलपत्र परेका छन् । निरन्तरको वर्षाका कारण बालबालिका र जेष्ठ नागरिकहरुले बढी समस्या झेलिरहेको बताईन्छ । केहि यात्रुहरु स्थानीय बजारमै रहेका छन् । खोलामा आएको बाढीको कारण करिब ५० मिटर सडक बगाएको छ । तत्काललाई उक्त स्थानमा ठुलो गाडिहरु चल्ने अवस्था नभएको प्रहरीको भनाई रहेको छ ।