जिल्ला प्रहरी कार्यालय रुकुम पश्चिमले तीन दिनमा २६ जना फरार प्रतिवादीलाई पक्राउ गरेको जनाएको छ । 

अदालतको फैसला कार्यान्वयनलाई कडाईका साथ लागु गरेको प्रहरीले पछिल्लो तीन दिनमा २६ जनालाई पक्राउ गरेको हो । 

जिल्ला प्रहरी कार्यालयका सूचना अधिकारी प्रहरी निरीक्षक बखत बहादुर शाहीका अनुसार असार १८ गतेका दिन १२ जना, १९ गतेका दिन नौ जना र २० गतेका दिन थप पाँच जना गरेर २६ जनालाई पक्राउ गरिएको हो । 

अदालतबाट आदेश भएका विभिन्न मुद्धामा फरार प्रतिवादीहरुलाई जिल्ला प्रहरी कार्यालय र मातहतका कार्यालयबाट खटिएको प्रहरी टोलीले पक्राउ गरेको प्रहरी निरीक्षक शाहीले जानकारी दिनुभयो । उहाँका अनुसार पक्राउ परेका प्रतिवादीहरुलाई आवश्यक कारबाहिको लागि रुकुम जिल्ला अदालतमा बुझाईएको छ । 

यस अघि तीन महिनाको अवधिमा २७ जना फरार प्रतिवादीहरुलाई पक्राउ गरिएको जिल्ला प्रहरी कार्यालयले जनाएको छ । यो सँगै गत वर्षको चैत १४ गते यता जिल्ला प्रहरी कार्यालयले ५३ फरार प्रतिवादीलाई पक्राउ गरेको जनाएको छ ।