रुकुम पश्चिम / रुकुम पश्चिमका ५० ओटा वडामा बिद्युतको केन्द्रीय लाईन पुगेको छ ।

जिल्लाका ७३ ओटा वडा मध्य ५० वडामा यसै साता केन्द्रीय लाईनको बिद्युत पुगेको नेपाल बिद्युत प्राधिकरण रुकुम पश्चिम वितरण केन्द्रका प्रमुख त्रिलोचन भट्टराईले बताउनुभयो ।

पछिल्लो पटक जिल्लाको सानिभेरी गाउँपालिकाको वडा नं. ४ र त्रिवेणि गाउँपालिकाको वडा नं. ४ मा केन्द्रीय लाइनको बिद्युत पुगेको प्रमुख भट्टराईले बताउनुभयो । ती वडामा अब मिटर जडान गर्ने बित्तिकै बिद्युत बल्नेछ । प्रमुख भट्टराईले यहि आर्थिक बर्ष भित्र जिल्लाका सबै वडाहरुमा बिद्युत लाईन बिस्तार गरिसक्ने लक्ष्य लिएको जानकारी दिनुभयो ।

बिद्युतको लाईन बिस्तार गरिएतापनि बेला बेला बिद्युतको अनियमितताले भने सेवाग्राहिहरु मर्कामा पर्ने गरेका छन् । बर्षायाम हावाहुरीले रुख ढलेर बिद्युतका तारमा अवरोध गर्ने, पहिरोले बिद्युतका पोल ढाल्ने गर्दा जिल्लामा बिद्युत सेवाले सास्ती दिने गरेको सेवाग्राहीहरुको गुनासो छ ।