गत वर्षको कार्तिक १७ गते जाजरकोट केन्द्रबिन्दु भएको भूकम्पबाट घर क्षती भई लाभग्राही कायम भएका रुकुम पश्चिमका १६ हजार भूकम्प पीडितहरुको लागि दोश्रो किस्ताको रकम निकाशा भएको छ । 

जिल्ला प्रशासन कार्यालयले १६ हजार लाभ्रग्राहीहरुलाई अस्थायी आवास निर्माण वापतको ४० करोड रुपियाँ सम्बन्धित स्थानीय तहमा पठाईसकिएको जनाएको छ । प्रमुख जिल्ला अधिकारी हरि प्रसाद पन्तले भूकम्पबाट प्रभावित घर परिवारलाई आवास निर्माण कार्यविधि, २०८० ले निर्दिष्ट गरे बमोजिम अस्थायी आवासको लागि दोश्रो किस्ताको रकम पठाईएको बताउनुभयो । 

जिल्ला प्रशासन कार्यालयका अनुसार हालसम्म लाभग्राहि कायम भएका ३२ हजार ९९६ जनालाई २५ हजारको दरले पहिलो किस्ताको रकम उपलब्ध गराईसकिएको छ । लाभग्राहि कायम भएका मध्य दुई हजार दुई जनाले अझै पनि पहिलो किस्ताकै अनुदान रकम पाएका छैनन् ।

अस्थायी आवास बनाएका लाभग्राहि मध्य हालसम्म चौरजहारी नगरपालिकाका दुई हजार ९४५, आठविसकोट नगरपालिकाका तीन हजार १३, सानीभेरी गाउँपालिकाका पाँच हजार ६४५ र त्रिवेणी गाउँपालिकाका चार हजार ३८८ जनाको लागि दोश्रो किस्ता वापतको ४० करोड रुपियाँ निकाशा पठाईएको छ । 

लाभग्राही कायम भएका मध्य १६ हजारलाई दोश्रो किस्ताको रकम पठाईएको छ भने थप रकम माग गरिएको छ । प्रमुख जिल्ला अधिकारी पन्तले पालिकाहरुबाट माग भई आएका आठविसकोट नगरपालिका दुई हजार ९८५ जना, बाँफिकोट गाउँपालिकाका दुई हजार ४२५ जना र त्रिवेणी गाउँपालिकाका ३३७ जना गरेर पाँच हजार ७४७ जना लाभग्राहिको लागि दोश्रो किस्ताको रकम राष्ट्रिय विपद् जोखिम न्यूनिकरण तथा व्यवस्थापन प्राधिकरणमा माग गरिएको छ ।

पालिकाहरुले विपद् पोर्टलमा समावेश भएका लाभग्राहिहरु अनुसार रकम माग गरेको आधारमा प्रशासनले प्राधिकरणमा माग गर्ने गरेको छ । 

भूकम्प प्रभावितलाई समस्या

आर्थिक वर्ष समापन हुँदासम्म पनि टहरा निर्माणको अनदाुन रकम नपाएको भन्दै समस्या भएको पीडितहरुको गुनासो रहेको छ । पुनर्निर्माणको काम सुरु गर्ने बेला टहराकै रकम पाउन नसकेको उनीहरुको भनाई छ । आठविसकोट नगरपालिका –१४ का बिराज परियारले ऋण निकालेर टहरा बनाएको तर सरकारबाट अझैपनि सबै रकम नपाएको बताउनुभयो । 

उहाँका अनुसार बर्षायाममा टहरामा बस्नुपर्दा थप समस्या झेल्नुपरेको छ । अस्थायी रुपमा बनाईएका धेरैमा टहराहरुमा पानी छेक्नै समस्या रहेको छ । यसका साथै टहरामा पानी पस्दा घरायसी सामाग्रीहरु जोगाउन मुश्किल परेको परियारले जनाउनुभयो ।

भूकम्प गएको महिनौ बितिसक्दा पनि कतिपयले पहिलो किस्ताकै रकम पाएका छैनन् भने लाभग्राही कायम भएका अधिकांसले दोश्रो किस्ता वापतको रकम पाएका छैनन् ।