रुकुम पश्चिमको सानीभेरी गाउँपालिकाले आगामी आर्थिक वर्ष ०८१/८२ मा दुई जना स्थानीयलाई डाक्टर पढ्नको लागि छात्रबृत्तिको व्यवस्था गरेको छ ।

गाउँपालिकाको १५ औ गाउँसभाको कार्यक्रम तथा बजेटमार्फत चिकित्सा शिक्षा अध्ययनका लागि साझेदारी कार्यक्रम सञ्चालन गर्ने र गाउँपालिकाको तर्फबाट दुई जनालाई छात्रबृत्तिका लागि दश लाख रुपियाँ बिनियोजन गरिएको छ । 

गतवर्ष पनि गाउँपालिकाले दुई जनालाई डाक्टर पठाउन छात्रबृतिको व्यवस्था गरेको थियो । गाउँसभाले अति विपन्न सुत्केरी महिला तथा आकस्मिक दुर्घटनाका लागि आवश्यक एम्बुलेन्स सेवालाई निःशुल्क बनाउने निर्णय गरेको छ । गाउँपालिका उपाध्यक्ष कमला रोकाका अनुसार यसका लागि गाउँपालिकाले दुई लाख रुपियाँ वजेटको व्यवस्था गरेको छ ।

त्यसैगरी गाउँपालिका भित्रका टुहुरा बालबालिकाहरुलाई मासिक सुरक्षा भत्ताको व्यवस्था गरिएको छ । यसका लागि दुई लाख ६४ हजार रुपियाँ बिनियोजन गरेको उपाध्यक्ष रोकाले जानकारी दिनुभयो ।  

गाउँपालिका भित्रका ४० वर्ष माथिका अविवाहित महिला र १२ वर्षसम्म श्रीमान् बेपत्ता भई एकल जीवन निर्वाह गरिरहेका महिलाहरुलाई सामाजिक सुरक्षा भत्ताको समेत व्यवस्था गरिएको छ । गाउँपालिकाले अति गरिब, दिर्घ रोगी, रकम अभावले उपचारको लागि समस्या झेलिरहेकाहरुको लागि नागरिक उपचार सहायता कार्यक्रमका ल्याएको छ । यसका साथै सुत्केरी स्याहार भत्ताको समेत व्यवस्था गरेको छ । 

श्रमिकका लागि सुरक्षा कोष

गाउँपालिकाले पहिलो पटक श्रमिकहरुलाई सामाजिक सुरक्षा कोषमा आवद्ध गर्ने कार्यक्रम र बजेट ल्याएको छ । गाउँपालिकाका प्रमुख प्रशासकिय अधिकृत दिपक बुढाथोकीका अनुसार करार कर्मचारी, संगठित तथा असंगठित क्षेत्रका श्रमिकलाई सामाजिक सुरक्षा कोषमा आबद्ध गर्नका लागि १२ लाख रुपियाँ विनियोजन भएको छ ।

यसैगरी महिलासँग उपाध्यक्ष कार्यक्रमका लागि तीन लाख र नमूना वडा अभ्यास कार्यक्रमका लागि १० लाख रकम व्यवस्था गरिएको छ । 

कृषि उत्पादनमा जोड

गाउँपालिकाले कृषि उत्पादन र पशुपालनमार्फत गाउँपालिकावासीको आर्थिकस्तर बलियो बनाउन सकिने जनाएको छ ।

जसको लागि भैसी श्रोत केन्द्र व्यवस्थापन गर्नलाई सात लाख छुट्याईएको छ भने उत्पादन तथा बिक्रिमा आधारित कृषि अनुदानका लागि १५ लाख र उत्पादनमा आधारित पशु सेवा तर्फको अनुदानका लागि २० लाख रुपियाँ बिनियोजन गरिएको छ ।