रुकुम पश्चिमको आठविसकोट नगरपालिका –१२ का बाढी प्रभावित परिवारलाई राहत वितरण गरिएको छ । 

नेपाल रेडक्रस सोसाईटी रुकुम पश्चिम शाखाले घटनास्थलमै पुगेर पीडितहरुलाई राहत उपलब्ध गराएको हो । 

रेडक्रसका जिल्ला सभापति रमा गौतमका अनुसार २१ घर परिवारलाई तत्काल आवश्यक पर्ने राहत सामाग्रीहरु उपलब्ध गराईएको हो । ४२ वटा म्याट, २१ थान त्रिपाल, ५० थान डोरी, २१ थान डिग्निटी किडका सामाग्रीहरु बाढी पीडित परिवारलाई उपलब्ध गराईएको सभापति गौतमले जानकारी दिनुभयो । 

बाढी प्रभावित परिवारलाई राहत विरतणका साथै रेडक्रसको टोलीले उद्धारको कार्यमा समेत सहयोग गरेको कोषाध्यक्ष यज्ञ खत्रीले जानकारी दिनुभयो । उहाँका अनुसार बाढीले घर क्षति गरेपछि घरभित्रका सामाग्रीहरुको व्यवस्थापन, परिवारलाई सुरक्षित स्थानमा सार्न रेडक्रसका स्वयमसेवकहरु परिचालन गरिएको छ । 

गएराती स्थानीय गिजागार खोलामा आएको बाढीले यहाँका तीन जना बालिकाको मृत्यु भएको छ भने एक जना बेपत्ता हुनुभएको छ । बाढीकै कारण नौ जना घाईते भएका छन् ।