सोसल मिडिया
यस वर्षको मनसुन सुरु भएयता भएका विपदजन्य घटनाको कारण रुकुम पश्चिममा चार जनाको मृत्यु भएको छ भन २६९ परिवार बिस्थापित भएका छन् । जिल्ला प्रशासनका कार्यालयले शुक्रबार सार्वजनिक गरेको विपद् बुलेटिनका अनुसार विपद्का कारण आठबिसकोट नगरपालिका वडा नम्वर १२ मा एक पुरुष र तीन जना महिलाको मृत्यु भएको छ ।
त्यसैगरी बाढी पहिरोको कारण आठविसकोट नगरपालिका, मुसिकोट नगरपालिका, सानीभेरी गाउँपालिका र बाँफिकोट गाउँपालिकाका २६९ घरधुरी विस्थापित भएका छन् ।
जिल्ला प्रशासन कार्यालयका सूचना अधिकारी एवम् सहायक प्रमुख जिल्ला अधिकारी विनोद रेग्मीका अनुसार आठबिसकोट नगरपालिका वडा नम्वर ९, १०,११, १२, १३ र १४ का २५० घरधुरी, बाँफिकोट गाउँपालिका वडा नम्वर ९ का चार घरधुरी बाढी पहिरोको उच्च जोखिमका कारण बिस्थापित भएका छन् ।
त्यसैगरी मुसिकोट नगरपालिका १, २, ५ र १४ का छ घरधुरी र सानीभेरी गाउँपालिकाका वडा नम्वर ७ र ८ का नौ घरधुरी घरपरिवार बिस्थापित भएका छन् ।
आठबिसकोटका केहि बिस्थापित परिवारहरुलाई वडा नम्वर ११ र १२ को कर्णाली वेभरेज, काष्ठ उद्योग र बृद्धाश्रममा राखिएको छ भने अन्य बिस्थापितहरु आफन्तको आश्रयमा बसेको सहायक प्रजिअ रेग्मीले जानकारी दिनुभयो । सानीभेरीका आठ बिस्थापित परिवारलाई स्थानीय बालकल्याण आधारभूत विद्यालयको भवनमा राखिएको छ ।
उहाँका अनुसार विपदजन्य घटनामा परेर आठविसकोटमा एक वटा भैसी र सानीभेरीमा तीन वटा बाख्रा मरेका छन् । त्यसैगरी जिल्लाभर १५ वटा घर पूर्ण क्षति, तीन वटा आंशिक क्षति भएका छन् भने १२ वटा उद्योग र एक विद्यालयमा पहिरोको कारण पूर्ण रुपमा क्षतिग्रष्त भएका छन् ।
