रुकुम पश्चिमको आठबिसकोट नगरपालिका -१२ को सार्किबारा बस्तीका चार घर पहिरोले पुरेको छ । लगातारको वर्षाको कारण गएको पहिरोले आईतबार राती यहाँका चार घरमा क्षती भएको हो । 

गिजागाड खोलामा आएको बाढीको कारण सार्कीबारामा पहिरो गएको थियो । पहिरोमा परेर चार घर भत्किएको वडा अध्यक्ष खम्मे कुसारीले जानकारी दिनुभयो । उहाँका अनुसार स्थानीय नन्दे सार्की, अलबहादुर सार्की, मनबहादुर सार्कीको र अर्जुन सार्कीको घर पहिरोमा परेर भत्किएका हुन् । 

लगातारको बर्षाको कारण बस्ती नै जोखिममा रहेपछि आईतबार बेलुका जोखिममा रहेका १० घरपरिवारलाई वडा कार्यालयमा सारिएको थियो । वडा अध्यक्ष कुसारीका अनुसार बेलैमा बस्तीका स्थानीयहरुलाई वडा कार्यालयमा सारिएकोेले कुनैपनि मानविय क्षति भने भएन । 

घर पहिरोमा पुरिएपछि त्यहाँभित्र रहेका अन्नपात लगायतका सामाग्रीहरु पुरिएका छन् । गिजागाड खोलाको सतह बढेकोले पल्लोपट्टि रहेको उक्त बस्तीमा जान नसकिएको वडा अध्यक्ष कुसारीले बताउनुभयो । क्षतिको विवरण समेत संकलन गर्न नसकिएको उहाँले जनाउनुभयो । 

उक्त बस्ती नै जोखिममा रहेको छ । गिजागाड खोला र उक्त पहिरो गएको स्थानका १० घर उच्च जोखिममा रहेको र पहिरोभन्दा माथिल्लो भागमा रहेको सम्पूर्ण बस्ती नै जोखिममा रहेको वडा अध्यक्ष कुसारीले उल्लेख गर्नुभयो । 

मनसुन सुरु भएयता यस वडामा चार जनाको मृत्यु भएको छ । गत साउन १ गते बिहान बाढीले टहरा पुरिदा तीन बालिकाको मृत्यु भएको थियो भने साउन ३ गते खोलामा आएको बाढीले बगाएर एक पुरुषकाे मृत्यु भएको थियो । बाढी पहिरोको कारण यहाँका सयौ घर र दर्जनौ बस्ती जोखिममा रहेका छन् ।