सोसल मिडिया
मध्यपहाडि राजमार्गको रुकुम पश्चिमखण्ड अवरुद्ध भएको छ । गएराती देखि परिरहेको बर्षाको कारण मध्यपहाडि राजमार्गको शितलपोखरी देखि रुकुम पूर्वको सिमाना खोपीचारसम्म विभिन्न १२ स्थानमा पहिरो गएको बताईएको छ ।
प्रमुख जिल्ला अधिकारी हरि प्रसाद पन्तका अनुसार दर्जन स्थानमा पहिरो गएको सूचनापछि जिल्ला सुरक्षा निकायको टोलीले स्थलगत निरीक्षण समेत गरेको छ । प्रमुख जिल्ला अधिकारी पन्तको नेतृत्वमा गएको सुरक्षा निकायसहितको टोलीले मुसीकोट नगरपालिका ७ र ८ पुगेर पहिरो गएको स्थानको निरीक्षण गरेको हो ।
प्रमुख जिल्ला अधिकारी पन्तले यसखण्डमा सवारी आवागमन अवरुद्ध रहेको बताउनुभयो । ठाउँ ठाउँमा गाडिहरु रोकिएको उहाँले जानकारी दिनुभयो । पहिरो र खोलामा आएको बाढीले गर्दा बाटो अवरुद्ध भएको उहाँले जनाउनुभयो ।
बाटो खुलाउनको लागि सडक डिभिजन कार्यालय चौरजहारी र मध्यपहाडि राजमार्ग कार्यालयसँग समन्वय भईरहेको उहाँले जनाउनुभयो । रुकुम पूर्व तर्फबाट मध्यपहाडि र पश्चिमतर्फबाट सडक डिभिजन कार्यालयले पहिरो पन्छाउन थालेका छन । तर, धेरै स्थानमा र ठुलो पहिरो भएका कारण आज सडक सुचारु हुने सम्भावना कमै रहेको छ ।
यस खण्डमा भिरालो र अप्ठ्यारो भूभाग रहेको कारण पटक पटक पहिरो जाने गरेको छ । सडक अवरुद्ध हुँदा रुकुम पश्चिमबाट रुकुम पूर्व हुँदै बाग्लुङ, पोखरा, काठमाडौ र रुकुमपूर्वबाट रुकुम पश्चिम हुँदै सल्यान, दाङ, नेपालगञ्ज जाने यातायातका साधनहरु रोकिएका छन् ।
