रुकुम पश्चिमको चौरजहारी नगरपालिकाले विज्ञान बिषय पढ्ने बिद्यार्थीहरुलाई छात्रबृत्तिको व्यवस्था गरेको छ । 

विज्ञान विषय पढ्ने विद्यार्थीहरुको रुचि हराउँदै गएको र संख्या समेत कम हुँदै गएकाे कुरालाई मध्यनजर गर्दै नगरपालिकाले छात्रबृत्ति दिने व्यवस्था गरेको हो । नगरपालिकाको वडा नम्वर ११ मा रहेको हिमालय माध्यमिक विद्यालय खोलागाउँमा २०६४ सालदेखि विज्ञान विषयको पढाई भईरहेको छ । 

उक्त विद्यालयको कक्षा ११ मा विज्ञान विषय पढ्ने ६० जना विद्यार्थीहरुलाई छात्रबृत्तिको व्यवस्था गरिएको नगर प्रमुख पुष्प वादीले जानकारी दिनुभयो । यसका लागि नगरपालिकाको चालु वर्षको नीति तथा कार्यक्रमबाट नै यो योजना पास गरिएको छ । नगर प्रमुख वादीका अनुसार प्रति बिद्यार्थी दश हजारको दरले छ लाख रुपियाँ विज्ञान पढ्ने बिद्यार्थीहरुलाई छात्रबृत्ति दिईनेछ ।

नगरपालिकाका निमित्त प्रमुख प्रशासकिय अधिकृत शेरप्रसाद ढकालका अनुसार विज्ञान प्रविधिको अध्ययनलाई सर्वसुलभ बनाई समयसापेक्ष प्राविधिक जनशक्ति निर्माण गर्न छात्रबृत्ति दिने कार्यक्रम ल्याईएको हो । उहाँले चौरजहारी र आसपासको क्षेत्रलाई लक्षित गरेर यो कार्यक्रम ल्याएको जानकारी दिनुभयो ।

विज्ञान विषय अध्ययन गर्ने बिद्यार्थीहरुको संख्या कमी हुँदै गएको र त्यसको असर विज्ञान र गणित बिषयका शिक्षकहरु पाउँनै मुश्किल हुने गरेको ढकालले उल्लेख गर्नुभयो । बार्षिक ६० जना बिद्यार्थी विज्ञान प्रविधितर्फका उत्पादन गरेर उक्त समस्या समाधान गर्ने उद्धेश्य नगरपालिकाले लिएको छ । 

हिमालय मावि खोलागाउँका सहायक प्रधानाध्यापक हिराबहादुर ओलीले नगरपालिकाको यस कार्यक्रमले विज्ञान पढ्न चाहनेहरुमा उत्प्रेरणा जाग्ने बताउनुभयो । यस विद्यालयमा २०६४ सालदेखि विज्ञान संकायको पढाई सञ्चालित छ । नगरपालिकाको नीति तथा कार्यक्रममै समावेश भएको यस व्यवस्थाले ६० जना विद्यार्थीहरुले अब निशुल्क विज्ञान पढ्न पाउने विद्यालयको भनाई छ । 

अहिले नयाँ भर्नाको समय भएकोेले विज्ञान पढ्न आउनेहरुको संख्या बढ्ने सहायक प्रधानाध्यापक ओलीको भनाई छ । यस विद्यालयमा विषयगत शिक्षकहरुद्धारा विज्ञान, कृषि जेटिए लगायतको पढाई हुने गरेको छ । 

यस विद्यालयमा निशुल्क रुपमा कृषि जेटिएको समेत पढाई भईरहेको छ । अघिल्लो शैक्षिक सत्रमा यस विद्यालयबाट समावेश भएका एसइई तर्फका ९६ प्रतिशत विद्यार्थीहरु उतिर्ण भएका थिए । पछिल्लो समय हिमालय माविले शैक्षिक क्षेत्रमा गुणस्तरतासँगै अब्बल स्थान हाँसिल गर्दै गईरहेको छ ।