सल्यानमा बिद्यालय नगएर हराएका दुई बालबालिका फेला परेका छन् । 

जिल्लाको सिद्धकुमाख गाउँपालिका ४ सौडोटा निवासी टेकबहादुर चलाउनेका ९ बर्षिय छोरा प्रेम चलाउने र ७ वर्षिया छोरी रितु चलाउनेलाई प्रहरीले फेला पारेको हो । 

जिल्ला प्रहरी कार्यालय सल्यानका अनुसार जनता कालिका आधारभुत विद्यालय टिलालीमा कक्षा १ मा अध्ययन गर्ने  प्रेम र निजको बहिनी हिजो सोमबार घरबाट बिद्यालय जाने भएर गएका थिए । विद्यालयमा पढ्न गएका छोराछोरी बेलुका सम्म घर नआएपछि प्रहरी चौकी ढोरचौरमा सूचना प्राप्त भएको थियो । 

बालबालिका हराएको सूचना लगत्तै प्रहरीले बिद्यालयमा बुझ्दा बिद्यालयमा नगएको एकिन भएको थियो । 

हराएका ती दाजुबहिनीको खोजीको लागि आज जिल्ला प्रहरी कार्यालयबाट प्रहरी निरीक्षक रेशम बहादुर खत्रीको नेतृत्वमा खटिएको प्रहरी टोलीले स्थानीयसँगको सहकार्यमा बालबालिकाको खोजी कार्य गरेको थियो । 

खोजी गर्ने क्रममा शारदा नगरपालिका वडा नम्वर ६ घट्टेखोला सडक छेउमा हिडीरहेको अवस्थामा ती बालबालिकालाई फेला पारेको प्रहरीले जनाएको छ ।

उनीहरुको स्वास्थ्य परिक्षण गराएर अभिभावकको जिम्मा लगाईएको सल्यान प्रहरीले जानकारी दिएको छ ।