रुकुम पश्चिमको चौरजहारी नगर कार्यपालिकाको कार्यालयले कर्मचारीहरुसँग कार्यसम्पादन करार सम्झौता गरेको छ । नगरपालिकाले आर्थिक वर्ष ०८१/०८२ को प्रभावकारी कार्यसम्पादनको लागि करार सम्झौता गरेको हो । 

नगर पालिकाका प्रवक्ता खुमबहादुर खड्काका अनुसार कार्यसम्पादन स्तरलाई थप प्रभावकारी बनाउन नगर प्रमुख पुष्प बादी र निमित्त प्रमुख प्रशासकीय अधिकृत शेर प्रसाद ढकाल बिचमा कार्यसम्पादन करार सम्झौता भएको छ । यसैगरी प्रमुख प्रशासकीय अधिकृत र शाखा/उपशाखा  प्रमुख र वडा सचिवहरू बिच पनि कार्य सम्पादन करार सम्झौता गरिएको प्रवक्ता खड्काले जानकारी दिनुभयो । 

निमित्त प्रमुख प्रशासकिय अधिकृत शेरप्रसाद ढकालले सूचकमा आधारित कार्य सम्पादन करार सम्झौताले नतिजामूलक कार्यसम्पादनका लागी थप जिम्मेवार बनाउने बताउनुभयो । नगरपालिकाबाट प्रवाह हुने सेवालाई थप प्रभावकारी कसरी बनाउने बिषयमा केन्द्रित रहेर सम्झौता गरिएको ढकालले जनाउनुभयो । 

नगरपालिकाले अहिले शून्य बेरुजु पालिका बनाउनको लागि अभियान समेत सुरु गरेको छ । नगरपालिकाले सेवाग्राही तथा नागरिक सन्तुष्टि मापनको कार्यलाई समेत नियमित गरिरहेको निमित्त प्रमुख प्रशासकिय अधिकृत ढकालले जानकारी दिनुभयो ।  यसका साथै सेवा प्रवाहलाई सजिलो बनाउन नगरपालिकाले एकीकृत सेवा प्रवाह केन्द्र समेत सञ्चालनमा ल्याएको छ ।