सोसल मिडिया
रुकुम पूर्वको सिस्ने गाउँपालिकालाई अल्ट्रासाउण्ड मेशिन हस्तान्तरण गरिएको छ ।
सिस्ने स्वास्थ्य चौकीमा अल्ट्रासाउण्ड सेवा सञ्चालनका लागि फेयर मेड फाउन्डेशन/सर्वाङ्गिण विकास केन्द्र (एच.डि.सि.) ले उक्त मेशिन सिस्ने गाउँपालिकालाई हस्तान्तरण गरेको हो ।
सर्वाङ्गिण विकास केन्द्रका परियोजना संयोजक उदय केसीका अनुसार ग्रामीण क्षेत्रका गर्भवती महिलाहरूलाई स्वास्थ्य संस्थामा अल्ट्रासाउण्ड जाँचको सुविधा उपलब्ध गराई सुरक्षित मातृत्व सुनिश्चित गर्न र गर्भावस्थाको समयमा जोखिम पहिचान गर्न अल्ट्रासाउण्ड मेशिन प्रदान गरिएको हो।
यसका साथै गर्भावस्था सम्बन्धी समस्याहरूको पहिचान गरी समयमै उपचार गर्ने व्यवस्था गरेर मातृ तथा शिशु मृत्युदर घटाउन र स्वास्थ्य सेवाको गुणस्तर सुधार गरी विश्वासको वातावरण जागृत गराउने उद्देश्यले उक्त मेशिन उपलब्ध गराईएको परियोजना संयोजक उदय केसीले जनाउनुभयो ।
मेशिनको साथमा ब्याकअपको लागि यूपिएस र एक थान ब्याट्री गरी जम्मा रकम पाँच लाख २१ हजार ४९५ रुपैयाँ बराबरको सामग्री समेत हस्तान्तरण गरिएको छ ।
सर्वाङ्गिण विकास केन्द्र (एचडिसि) नेपाल का अध्यक्ष ई. संगित रेग्मी र परियोजना संयोजक उदय केसीले सिस्ने गाउँपालिका अध्यक्ष कृष्ण रेग्मीको विशेष उपस्थितिमा पालिकाका प्रमुख प्रशासकिय अधिकृत रेवत बुढाथोकी र स्वास्थ्य संयोजक सुरेन्द्र यादवलाई सिस्ने स्वास्थ्य चौकीबाट सेवा प्रवाह हुनेगरी उक्त मेसिन हस्तान्तरण गर्नुभएको हो ।
यसका साथै स्वास्थ्य तालिम केन्द्र लुम्बिनी प्रदेश बुटवलको आयोजना, स्वास्थ्य कार्यालय रुकुम पूर्वको संयोजन र फेयरमेड, एचडिसि नेपालको आर्थिक सहयोगमा सिस्ने स्वास्थ्य चौकी र हुकाम स्वास्थ्य चौकीबाट १/१ जना गरी दुई जनालाई एसबिए तालिम प्राप्त नर्सिङ स्टाफका लागि २१ दिने ग्रामीण प्रसूति अल्ट्रासाउण्ड सेवा तालिमका लागि आम्दा अस्पताल झापामा पठाउन लागिएको बताईएको छ ।
