रुकुम पश्चिमको बाँफिकोट गाउँपालिका –६ मग्मामा रहेको उच्च प्रविधियुक्त हाईटेक नर्सरी पहिरोको कारण क्षतिग्रष्त भएको छ ।

लगायतारको बर्षाको कारण नर्सरीमूनि रहेको सडकतर्फको भागमा आएको पहिरोले नर्सरीमा पूर्ण क्षती भएको हो । 

कर्णाली प्रदेश सरकारको उद्योग, पर्यटन, वन तथा वातावरण मन्त्रालयको सहयोगमा डिभिजन वन कार्यालय रुकुमपश्चिमले स्थापना गरेको उक्त नर्सरी अहिले युवा सिर्जनशिल कृषि तथा पशुपंक्षि फर्मले सञ्चालन गरिरहेको छ । करिब एक करोड दश लाखको लगानीमा निर्मित उक्त नर्सरी गत वर्षको मङसिर महिनाबाट मात्र सञ्चालनमा आएको थियो ।

डिभिजन वन कार्यालयका प्रमुख शेरबहादुर परियारले हाईटेक प्रविधिको उक्त नर्सरी पहिराले क्षतिग्रष्त बनाएको बताउनुभयो । उहाँका अनुसार पहिरोले नर्सरीमा जडान गरिएका सबै संरचनाहरुमा क्षति गरेको छ । 

फर्म सञ्चालिका समकृति पुनका अनुसार छिनखेत नदुवा सडकखण्डतर्फको भागबाट पहिरो जाँदा नर्सरीको आधा भाग भत्किएको छ भने जडान भएका सबै उपकरणमा क्षति पुगेको छ ।  

हाईटेक नर्सरीको रुपमा जडान गरिएका कुनैपनि संरचना सहि हालतमा नरहेको सञ्चालिका पुनको भनाई छ । ‘अब हाईटेक नर्सरी रहेन’, पुनले भन्नुभयो, ‘विरुवा उत्पादन र बजारीकरणको श्रृखला जोडेर लयमा आउन थालेको बेला नर्सरीमा पहिरो जानु किसानहरुको लागि समेत दूर्भाग्य हो ।’ उहाँका अनुसार संरचनाहरु भत्किएतापनि राखिएका बिरुवाहरुमा भने ठुलो क्षति भएको छैन ।