रुकुम पश्चिमको एक निजि बिद्यालयले उत्कृष्ट बिद्यार्थीहरुलाई निःशुल्क पढाउने व्यवस्था गरेको जनाएको छ । 

जिल्लाको मुसिकोट नगरपालिका -१ खलंगामा रहेको विजयश्वरी सकेन्डरी इङ्लिस मिडियम बोर्डिङ स्कुलले उत्कृष्ट बिद्यार्थीहरुलाई निःशुल्क रुपमा पढाउने कार्यक्रम ल्याएको हो । 

विद्यालयका प्रिन्सिपल जय बहादुर थापाका अनुसार विद्यालयले अतिरिक्त क्रियाकलापमा उत्कृष्ट हुने विद्यार्थीलाई पुर्ण रुपमा निःशुल्क पढाउने प्रावधान ल्याएको हो । यसका साथै एसइईको नतिजामा ३.६ भन्दा माथिको जिपिए प्राप्त गर्ने विद्यार्थीलाई शुल्कमा ५० प्रतिशतमा छुटको व्यवस्था गरेको समेत थापाले जानकारी दिनुभयो । 

आजैबट विद्यालयले अल एटेन्ड सेवाको समेत सुरुवात गरेको छ । सम्भवतः कर्णाली प्रदेशमै पहिलो पटक विद्यालयमा उक्त सेवा सुरुवात गरिएको प्रिन्सिपल थापाको दाबी रहेको छ । 

यो सेवामा विद्यार्थी विद्यालयमा पुगेको समय, विद्यालयबाट निस्केको समयको जानकारी अभिभावकको फोनमा एसएमएस मार्फत पुग्ने गर्दछ । यसका लागि विद्यार्थीले आफ्नो परिचयपत्र अल एटेन्ड सिस्टममा देखाएपछि सिधै अभिभावकलाई एसएमएस मार्फत जानकारी हुने गर्दछ । - घनश्याम खड्का