सोसल मिडिया
रुकुम पश्चिमको चौरजहारीमा सञ्चालित सहिद स्मृति नगर अस्पतालबाट सेवा लिनेहरुको संख्या १५ हजार बढी रहेको छ ।
चौरजहारी नगरपालिका -१० मा रहेको यस अस्पतालले गत आर्थिक वर्ष २०८०/०८१ मा १५ हजार २२६ जनालाई सेवा दिएको जनाएको छ ।
अस्पताल प्रशासक विश्व प्रकाश ओलीका अनुसार गाउँमै डाक्टरसहितको अस्पताल सञ्चालन भएपछि सेवा लिन आउने बिरामीहरुको संख्या बढीरहेको छ ।
गत वर्ष नगर अस्पतालमा ३१२ जनाको माईनर सर्जिकल गरिएको थियो भने १०२ जना सुत्केरी भएका थिए । अस्पताल प्रशासक ओलीले पाँच शैयाको यस अस्पतालमा दैनिक सात जना बढी बिरामी भर्ना हुने गरेको जानकारी दिनुभयो ।
उहाँका अनुसार गत वर्ष एक हजार ८७८ जनाले एक्सरे सेवा लिएका छन् भने ६ हजार ८३८ जनालाई ल्याब सेवा दिईएको छ । त्यसैगरी २०१ जनाले परिवार नियोजनका साधनको प्रयोगबारे सेवा लिएका छन् भने ५०५ जना बिरामीलाई भर्ना गरेर उपचार गरिएको छ ।
अस्पतालका डाक्टर विवेक केसीले ग्याष्टिक र दुखाई तथा चोट पटक लागेका बिरामीहरु बढी मात्रामा आउने गरेको जानकारी दिनुभयो । गाउँमै डाक्टरसहितको सेवा रहेकोले उपचारका लागि अस्पताल नै आउने बिरामीहरुको संख्या बढीरहेको उहाँको भनाई छ ।
विगतमा बिरामीलाई गाउँमै धामी, झाँक्रि तथा घरेलु उपचार गर्ने चलन बढी मात्रामा रहेको थियो । नगर अस्पताल सुरु भएपछि रुकुम पश्चिमका साथै सल्यान जिल्ला समेतका बिरामीहरुले बढी मात्रामा सेवा लिने गरेका छन् ।
