सोसल मिडिया
रुकुम पश्चिमको मुसिकोट नगरपालिका -९ स्थित काउले खोलामा एक पुरुषको शव फेला परेको छ । मङगलबार बिहान खोलाको किनारमा शव भेटिएको हो ।
मुसिकोट नगरपालिका वडा नम्वर ९ का वडा अध्यक्ष शशिराम पुनका अनुसार सोहि वडा निवासी अन्दाजी ६५ बर्षीय भुपाल ओलीको शव खोलाको किनारमा फेला परेको हो । खोलामा शव फेला परेको सूचना आएपछि प्रहरीलाई खबर गरिएको उहाँले बताउनुभयो ।
उहाँका अनुसार सोमबार बेलुका उहाँ घरबाट निस्कनुभएको थियो । आज बिहान दाउरा संकलनका लागि खोला किनारमा गएका स्थानीयले शव देखेका थिए ।
खोला किनारमा निस्वस्त्र अवस्थामा एक पुरुषको शव फेला परेको भन्दै स्थानीयले खबर गरेपछि घटनास्थलतर्फ प्रहरी टोली पठाएको जिल्ला प्रहरी कार्यालय रुकुमपश्चिमले जनाएको छ ।
सोमबार दिउँसो देखि परेको अबिरल बर्षाको कारण आएको खोलामा बगेर मृत्यु भएको हुनसक्ने अनुमान स्थानीयको रहेको छ । प्रहरीले भने अनुसन्धानपछि मात्र थप विवरण खुल्ने जनाएको छ ।
