आज शुक्रबारका दिन रुकुम पूर्वको पुथा उत्तरगंगा गाउँपालिकामा सार्वजनिक बिदा दिईएको छ । 

गाउँपालिका उपाध्यक्ष भुपेन्द्रा बुढा, उहाँकी आमा तथा पुथा उत्तरगंगा गाउँपालिका वडा नम्वर १२ रहेको प्राथमिक स्वास्थ्य केन्द्र कोलमा सामुदायिक महिला स्वास्थ्य स्वयमसेविका पदमा कार्यरत गोपीमाया बुढा र वडा नम्वर २ का वडा अध्यक्ष जस बहादुर श्रीपालीको सडक दुर्घटनामा मृत्यु भएको शोकमा आज गाउँपालिकामा सार्वजनिक बिदा दिईएको हो । 

गत भदौ २८ गते काठमाडौबाट रुकुम पूर्व फर्कने क्रममा बागलुङ जिल्लाको गलकोट नगरपालिका –२ स्थित नेरठाँठीको भुङखानीमा उहाँहरु चढेको गाउँपालिकाको रा १ झ २०० नम्वरको बोलेरो जिप दुर्घटना हुँदा तीनै जनाको घटनास्थलमै मृत्यु भएको थियो । 

पुथा उत्तरगंगा गाउँपालिकाका निमित्त प्रमुख प्रशासकीय अधिकृत समिर गिरीले अकल्पनिय तथा दुःखद घटनाले सिंगो गाउँपालिका शोकमा डुबेको र शुक्रबारका दिन सार्वजनिक बिदा दिईएको बताउनुभयो । उहाँका अनुसार गाउँपालिका र यस अन्तर्गतका वडा कार्यालयहरु, स्वास्थ्य संस्थाहरु, गाउँपालिकास्थित सम्पूर्ण सामुदायिक तथा संस्थागत विद्यालयहरु, बैंक तथा बित्तिय संस्थाहरुमा बिदा दिईएको छ । 

यसैगरी गाउँपालिकाले उहाँहरुको निधनको शोकमा असोज ७ गते सोमबारका दिन शोक सभा गर्ने जनाएको छ । मृतकहरुको असामयिक तथा दुःखद निधनप्रति शोक व्यक्त गर्न गाउँपालिकाको कार्यालय तकसेरामा उपस्थित हुन गाउँपालिकाले सूचना मार्फत जानकारी दिएको छ ।