सोसल मिडिया
रुकुम पश्चिमको चौरजहारी नगरपालिका क्षेत्रभित्रका ४६ जना पाठेघर खसेका महिलाहरूको निःशुल्क अप्रेसन हुने भएको छ ।
नगरपालिकाले यौन तथा प्रजनन् स्वास्थ्य जाँच शिविर सञ्चालन गरेर पहिचान भएका पाठेघर खसेका महिलाहरूको नि:शुल्क अप्रेसन हुने जनाएको छ ।
नगरपालिकाका निमित्त प्रमुख प्रशासकीय अधिकृत शेर प्रसाद ढकालका अनुसार नगरपालिका क्षेत्रभित्र विभिन्न पाँच स्थानमा शिविर सञ्चालन गरी एक हजार ६८० जना महिलाहरूको स्वास्थ्य परीक्षण गरिएको थियो । सो क्रममा पाठेघर खसेका ४६ महिला पहिचान भएको ढकालले जानकारी दिनुभयो ।
चौरजहारी नगरपालिकाको आयोजना र आड्रा नेपालको आर्थिक तथा प्राविधिक सहयोगमा १० दिनसम्म पाँच ठाउँमा स्वास्थ्य जाँच परीक्षण शिविर सञ्चालन गरिएको थियो । अप्रेसनका लागि छनोट भएका ४६ जना पाठेघर खसेका महिलाहरूको कोहलपुर मेडिकल कलेजमा अप्रेसन हुने नगर प्रमुख पुष्प वादीले जानकारी दिनुभयो । एक जना कुरुवासहित अप्रेसनको सबै खर्च भने निःशुल्क हुनेछ ।
ग्रामीण परिवेशमा अझै पनि महिलाहरू रोग लुकाएर बस्ने गरेका कारण समयमै उपचार नपाउने अवस्थाको अन्त्य गर्न नगरपालिकाले आड्रा नेपालसँग सहकार्य गरेको नगर प्रमुख वादीले बताउनुभयो ।
स्त्रीरोग विशेषज्ञ डा. मधु तुम्बाहाम्फेको नेतृत्त्वमा एक दर्जन स्वास्थ्यकर्मीको टोली शिविरमा परिचालन भएको थियो ।
नगरपालिकाले प्राथमिक स्वास्थ्य केन्द्र कोटजहारी, सहिदस्मृति नगर अस्पताल, १४ नम्वर वडा कार्यालय, वडा नम्वर १२ स्थित आधारभूत स्वास्थ्य केन्द्र र वडा नम्वर ३ स्थित आधारभूत स्वास्थ्य केन्द्रमा स्वास्थ्य जाँच शिविर सञ्चालन गरेको थियो ।
