राप्ती राजमार्ग अन्तर्गत रुकुम पश्चिमको मुसीकोट नगरपालिका –१ र बाँफिकोट गाउँपालिका –१० जोड्ने मोटरेबल गाराघाट पुल उद्घाटन भएको छ । 

पूर्व अर्थमन्त्री एवम् प्रतिनिधी सभा सदस्य जनार्दन शर्माले आईतबार पुलको उद्घाटन गर्नुभएको हो । पुल उद्घाटन गर्नुहुँदै शर्माले आर्थिक विकास तथा उत्त्पादित कृषि उपजहरु निर्यात गरेर समृद्धि हाँसिल गर्न सकिने बताउनुभयो । उहाँले ढिलै भएपनि गाराघाटमा निर्माण भएको पुलले विकास र सहज यातायात पहुँचमा टेवा पुग्ने बताउनुभयो ।

तीन वर्षमै सम्पन्न गर्ने गरी सम्झौता भएको गाराघाट पुल आठ वर्षपछि निर्माण हाृे । सडक डिभिजन कार्यालय चौरजहारी मार्फत आर्थिक वर्ष ०७२/०७३ मा गाराघाट पुल निर्माणको ठेक्का खोलिएको थियो । भ्याट रकम बाहेक आठ करोड ५० लाख ४८ हजार ७७८ रुपियाँमा काम सम्पन्न गर्नेगरी नागार्जुन कन्ट्रक्सन कम्पनीले तीन वर्षमै निर्माण सम्पन्न हुने गरेर २०७३ असार ३१ गते सम्झौता गरेको थियो । 

सडक डिभिजन कार्यालयका डिभिजन प्रमुख तेजस्वी शर्माका अनुसार सम्झौता गर्दाको बेला पुलको डिजाईन ‘पायल’ फाउण्डेशनमा आधारित थियो । तर यो फाउण्डेशनबाट उक्त स्थानमा पक्कि पुल सम्भव नभएपछि बदलेर ‘ओपन’ फाउण्डेशन डिजाईन गरिएको थियो । डिजाईन परिवर्तनपछि काम तिब्र पारेर पुल निर्माण सफल भएको डिभिजन प्रमुख शर्माले जानकारी दिनुभयो ।

निर्माण कम्पनीले विगतमा फाउण्डेशन परिवर्तनमा ढिलाई भएको, कोरोना लगायतका महामारीले सामाग्री ढुवानी र कामदार परिचालनमा समस्या भएकोले समयमै पुल निर्माण हुन नसकेको जनाएको थियो । भेरीनदिमाथि पुल नहुँदा विशेष गरेर वर्षायाममा सर्वसाधारणहरुलाई आउजाउ र दैनिक उपभोग्य सामाग्री ढुवाानीमा समस्या हुने गरेको थियो । अव भने स्थानीयलाई सहज हुने भएको छ ।

अब जिल्ला सदरमुकामबाट बाँफिकोट गाउँपालिका, आठबिसकोट नगरपालिका हुँदै डोल्पातर्फ जान तथा जिल्ला सदरमुकाम मुसीकोटतर्फ आउन सहज हुने भन्दै स्थानीयवासी खुशी भएका छन् ।