सोसल मिडिया
रुकुम पश्चिमको मुसिकोट नगरपालिका –५ सेरीगाउँबाट अवैध लागु औषध अफिमसहित दुई जना पक्राउ परेका छन् ।
जिल्ला प्रहरी कार्यालय रुकुम पश्चिमले आठ किलो एक सय ग्राम अफिमसहित दुई जनालाई पक्राउ गरेको जानकारी दिएको छ ।
पक्राउ पर्नेमा मुसिकोट नगरपालिका –९ घर भई हाल वडा नम्वर ५ सेरीगाउँ बस्ने ३६ वर्षिय भिमबहादुर ओली र आठबिसकोट नगरपालिका –२ स्याला बस्ने ३५ वर्षीय अजय यरी रहेका छन् ।
जिल्ला प्रहरी कार्यालयका सूचना अधिकारी प्रहरी निरीक्षक बखत बहादुर शाहीले अवैध अफिमको कारोबार भईरहेको बेला ड्युटीमा खटिएको प्रहरी टोलीले शुक्रबार राती अफिमसहित दुई जनालाई नियन्त्रणमा लिएको जानकारी दिनुभयो । उहाँका अनुसार अफिम कारोबारमा संलग्न ओली र यरीबाट आठ किलो एक सय ग्राम अफिम र तीन वटा मोबाईल समेत बरामद गरिएको छ ।
सेरीगाउँबाट ज्यामडाँडातर्फ जाने पक्कि सडकको छेवैमा पहेलो रंगको प्लाष्टिकको बोरा यरीले दिदै गरेको र ओलीले लिदै गरेको अवस्थामा प्रहरीले पक्राउ गरेको हो ।
पक्राउ परेकाहरु बिरुद्ध अवैध लागु औषध मुद्धा दर्ता गरी रुकुम जिल्ला अदालतबाट जरुरी पक्राउ पूर्जि स्वीकृत गराई घटनाको थप अनुसन्धान सुरु गरिएको जनाएको छ ।
