सोसल मिडिया
रुकुम पश्चिम । सहिद पुर्ण प्रसाद शर्माको २६ औं स्मृतिमा सञ्चालन गरिएको विभिन्न प्रतियोगिताहरु सम्पन्न भएका छन् ।
चौरजहारी नगरपालिका ९ मा सञ्चालन भएको सहिद पुर्ण प्रसाद शर्मा स्मृति कप अन्तर्गतको खुल्ला वडा स्तरिय पुरुष भलिवल प्रतियोगिताको उपाधि चौरजहारी नगरपालिका वडा नम्वर ७ ले हात पारेको छ ।
गत शुक्रबारबाट वडा नम्वर ९ को कोटमा सुरु भएको प्रतियोगितामा सानीभेरी गाउँपालिका वडा नम्वर ३ ले दोश्रो, सल्यानको कुमाख गाउँपालिका वडा नम्वर ५ ले तृतीय स्थान र चौरजहारी नगरपालिका वडा नम्वर ५ खहरेले सान्त्वना स्थान प्राप्त गरेका छन् ।
प्रतियोगितामा उत्कृष्ट खेलाडीको पुरस्कार चौरजहारी नगरपालिका वडा नम्वर ७ का कमल सुनारले प्राप्त गरेको भलिवल खेल संचालक संयोजक पवन शाहीले जानकारी दिनुभयो । प्रतियोगितामा रुकुम पश्चिम र सल्यान जिल्लाको समेत गरी विभिन्न १३ वटा समुहले भाग लिएका थिए ।
भलिबल प्रतियोगितामा प्रथम हुने समुहले नगद रु. ६० हजारका साथ कप, मेडल र प्रमाण पत्र प्राप्त गरेका छन् भने दोश्रो हुने समुहले रु ४० हजार नगद, कप, मेडल, प्रमाण पत्र प्राप्त गरेका छन् ।
त्यसैगरी तृतीय स्थान हाँसिल गर्ने समुहले रु २० हजार नगद, मेडल, प्रमाण पत्र र सान्त्वना स्थान प्राप्त गर्ने समुहले नगद रु १० हजार, मेडल र प्रमाण पत्र प्राप्त गरेको खेल आयोजक समितिका संयोजक एवम् सहिद पुर्णप्रसाद शर्माका जेठा छोरा राजेन्द्र शर्माले जानकारी दिनुभयो ।
स्मृति कपको अवसरमा खुल्ला नृत्य, लोक नृत्य, र स्थानीय सिंगारु नृत्य प्रतियोगिताको पनि आयोजना गरिएको थियो ।
खेलकुद व्यवस्थापक महेश स्वर्णकारका अनुसार सिंगारु नाच प्रतियोगितामा स्थानीय कालिका महिला आमा समुह चौरजहारी नगरपालिका वडा नम्वर ९ प्रथम र चौरजहारी नगरपालिका वडा नम्वर ३ स्यालखोलाले दितिय स्थान हात पारेका छन् ।
खुला नृत्य प्रतियोगितामा आँचल शर्मा प्रथम र खुला लोक नृत्यमा चौरजहारी नगरपालिका वडा नम्वर ५ खहरेकी प्रतिमा राणले प्रथम स्थान हाँसिल गरेको आयोजकले जानकारी दिएको छ ।
चौरजहारी नगरपालिका वडा नम्वर ९ निवासी सहिद पुर्ण प्रसाद शर्माको तत्कालिन जनयुद्धको बेला २०५५ साल असोज २६ गते हत्या गरिएको थियो ।
उहाँको सम्मान र संझनामा पारिवारले पहिलो पटक सहिद पुर्ण प्रसाद शर्मा स्मृति कप, खुल्ला वडा स्तारिय पुरुष भलिवल प्रतियोगिता तथा विविध सांस्कृतिक कार्यक्रम २०८१ को आयोजना गरिएको हो ।
प्रतियोगिता सञ्चालनको लागि विभिन्न व्यक्ति तथा निकायबाट दुई लाख २४ हजार ३०५ रुपियाँ सहयोग प्राप्त भएको थियो । सहिद परिवारका तर्फबाट ६० हजार, विभिन्न सहयोगी दाताहरुबाट एक लाख २७ हजार २०५, भलिबल खेल दर्ता शुल्कबाट ३३ हजार र नृत्य प्रतियोगिताको सहभागि शुल्क वापत चार हजार एक सय रुपियाँ प्राप्त भएको आयोजकले जानकारी दिएको छ ।
यस क्रममा पुरस्कार तथा व्यवस्थापनको क्रममा एक लाख ९९ हजार दुई सय रुपिँया खर्च भएको छ । भलिबलको पुरस्कार एक लाख ३१ हजार, साँस्कृतिक कार्यक्रम तर्फको पुरस्कार २० हजार, व्यवस्थापन खर्च १३ हजार सात सय, कप मेडल, छपाई तथा जेनेरेटर खर्च ३१ हजार पाँच सय र टेन्ट भाडाामा तीन हजार रुपियाँ खर्च भएको बताईएको छ ।
कार्यक्रमबाट २५ हजार १०५ रुपियाँ बचत भएको छ । उक्त रकम आगामी वर्ष सञ्चालन गरिने दोश्रो सहिद पुर्ण प्रसाद शर्मा स्मृति कप र स्थानीय कालिका मन्दिर निर्माण समितिलाई उपलब्ध गराईने आयोजकले जानकारी दिएको छ ।
