सोसल मिडिया
तिहारको अवसरमा खेलिएको देउसी भैलोबाट संकलित रकम भोज गर्ने, भ्रमणमा जाने लगायतका कार्यमा खर्च गर्ने चलन रहेको पाईन्छ । तर रुकुम पश्चिमका युवाहरुको एक टोलीले तिहारमा अवसरमा खेलिएको देउसीबाट संकलन भएको रकम एक बिरामीको उपचारका लागि उपलब्ध गराईएको छ ।
जिल्लाको सानीभेरी गाउँपालिका -३ श्रीचौरको युवा टोलीले तिहारमा देउसी खेलेर उठेको रकम मोटर साईकल दुर्घटनामा परेर घाईते हुनुभएका स्थानीयवासी शिक्षक मस्त बहादुर खड्काको उपचारको लागि हस्तान्तरण गरेको हो ।
देउसी टोलीका अगुवा कमल जंग रसाईलीका अनुसार घाईते खड्काको घरमा गएर देउसीभैली खेलेर बचेको पाँच हजार तीन सय रुपियाँ उहाँका आफन्तलाई उपलब्ध गराईएको छ । रसाईलीका अनुसार तिहारको दिन एक घण्टा जति गाउँमा देउसी खेलेको र उठेको रकममा केहि रकम स्थानीय युवाहरुबाट संकलन गरेर घाईतेको परिवारलाई हस्तान्तरण गरिएको हो ।
वडा अध्यक्ष जगदिश नकाल, युवाहरु कमल जंग रसाईली, बलबहादुर बिक, बिरसिं बिक, नविन रसाईली, गोपाल बिक लगायतको टिमले आज उहाँकै घरमा गएरसहयोग रकम उपलब्ध गराएको हो ।
रकम हस्तान्तरण गर्नुहुँदै वडा अध्यक्ष नकालले युवाहरुले सहयोगी भावनाकासाथ देउसीको रकम घाईतेका उपचारका लागि हस्तान्तरण गरेको बताउनुभयो । उहाँले युवाहरुको यस कार्य उदाहरणीय र प्रशसंणीय रहेको जनाउनुभयो । फजुल खर्च गर्नुभन्दा यस खालका सामाजिक कार्यमा रकम खर्च गर्नु पुण्य कार्य हुने उहाँको भनाई छ ।
सानीभेरी माध्यमिक विद्यालय बलिबाङमा करार शिक्षकमा कार्यरत खड्का गत असार ४ गतेका दिन विद्यालयबाट घर फर्कने क्रममा मोटरसाईकल दुर्घटनामा परेर गम्भिर घाईते हुनुभएको थियो । हाल उहाँको उपचार नेपाल मेडिसीठि अस्पतालमा भईरहेको छ ।
यसअघि पत्रकार तथा युवा अभियान्ता नारायण ओलीले शिक्षक खड्काको उपचारका लागि देश तथा विदेशमा रहेका विभिन्न व्यक्तिहरुबाट आर्थिक सहयोग आह्वान गरेर संकलित रकम घाईतेका परिवारलाई उपलब्ध गराउनु भएको छ । उपचारका क्रममा ठुलो धनराशी खर्च भईसकेको र कमजोर आर्थिक अवस्थाको कारण उहाँको थप उपचार प्रभावित हुन थालेपछि ओलीले सहयोग संकलन अभियान चलाउनुभएको थियो ।
