सुर्खेतमा पिकनिक खान गएकाहरु सवार गाडी दुर्घटनामा परेको छ । बुधबार भेरीगंगा नगरपालिकाको छिन्चुबाट पिकनिक (वनभोज) खान वीरेन्द्रनगरको कटकुवा गएर फर्किँदै गरेको गाडी दुर्घटनामा परेको हो ।

सुर्खेत प्रहरीका अनुसार कर्णाली प्रदेश ०२००१ ख १८८ नम्बरको फोर्स गाडी कपासे नजिकै रहेको नेपाली सेनाको गेट अगाडिको मोडबाट खानेपानी ट्यांकीतर्फ खसेको छ । गाडीमा २६ जना सवार रहेको र ती सबै घाइते भएको जिल्ला प्रहरी कार्यालय सुर्खेतका प्रवक्ता प्रहरी नायव उपरीक्षक वीरेन्द्रविर विश्वकर्माले जानकारी दिनुभयो ।

उहाँका अनुसार घाइतेमध्ये दुई जनाको अवस्था गम्भीर रहेको छ । गम्भिर घाईते हुनेमा चालक कर्णबहादुर बिक र नवीज घर्ती रहेको प्रहरीले जानकारी दिएको छ । यस्तै केही मध्यम खालको छन् भने केही सामान्य घाइते रहेका छन् । 

सबैलाई उपचारका लागि प्रदेश अस्पतालमा पठाइएको उहाँले जानकारी दिनुभयो । मोडमा तिब्र गतिको कारण गाडि दुर्घटना भएको प्रत्यक्षदर्शीहरुले जनाएका छन् ।