सोसल मिडिया
रुकुम पश्चिमको चौरजहारी नगरपालिकाले क्रिकेट खेलाडीहरुको दुर्घटना बिमा गरिदिने भएको छ ।
नगरपालिका प्रमुख पुष्प वादीले हालै सानीभेरीमा भएको पालिकास्तरीय क्रिकेट प्रतियोगितामा प्रथम स्थान हाँसिल गर्ने चौरजहारी नगरपालिकाका खेलाडीहरूलाई दुर्घटना बिमा गर्ने घोषणा गर्नु भएको हो ।
रुकुम पश्चिमको सानीभेरी गाउँपालिका खेलकुद विकास समितिले आयोजना गरेको टी - २० खुला क्रिकेट प्रतियोगितामा चौरजहारी नगरपालिकाको टिमले प्रथम स्थान हाँसिल गरेको थियो ।
उक्त टोलीमा रहेका खेलाडीहरुलाई सम्मान गर्दै ५ लाख बराबरको दुर्घटना बिमा गर्ने नगर प्रमुख वादीले बताउनुभयो । यो घोषणासँगै खेलमा सहभागी १६ जना खेलाडीहरूको ५ लाखका दरले हुन आउने ८० लाख बराबरको दुर्घटना वापतको रकम सुनिश्चित भएको छ ।
सबै विधाका खेलाडीहरूको मनोबल उच्च बनाउन यस्तो घोषणा गरेको नगर प्रमुख बादीले बताउनुभयो । जिल्लास्तरमा हुने अन्य खेलकुदमा प्रथम स्थान हाँसिल गर्ने खेलाडीहरूलाई नगरपालिकाले दुर्घटना बिमा गरिदिने समेत उहाँको भनाइ छ ।
यसैबिच गत कार्तिक ९ गतेदेखि १४ गतेसम्म सञ्चालन भएको प्रतियोगितामा प्रथम स्थान हासिल गर्ने खेलाडीहरूलाई चौरजहारी नगरपालिका नगर कार्यपालिकाको कार्यालयले बुधबार एक कार्यक्रमका बिच सम्मान गरेको छ ।
