रुकुम पश्चिमका विभिन्न सडकखण्डमा सवारी साधन सञ्चालन गर्ने यातायात व्यवसायीहरुले यात्रुबाट आफू खुशि भाडा लिने गरेको गुनासो बढेको छ ।

गुनासो पश्चात जिल्ला प्रशासन कार्यालयले भाडादर निर्धारणका लागि एक समिति गठन गरेको छ । 

सोमबार जिल्ला प्रशासन कार्यालयमा प्रमुख जिल्ला अधिकारी कुलबहादुर जी.सी.को अध्यक्षतामा बसेको बैठकले सहायक प्रमुख जिल्ला अधिकारी विनोद रेग्मीको संयोजकतत्वमा सात सदस्यीय भाडादर निर्धारण समिति गठन गरेको छ । 

प्रमुख जिल्ला अधिकारी जी.सी.का अनुसार निर्धारित भाडादर भन्दा बढी रकम असुल्ने गुनासो बढेको र नयाँ तथा पुराना सडकहरुको स्तरोन्नती समेत भएको कारण पूर्व निर्धारित भाडादर परिमार्जन गरी नयाँ भाडादर कायम गर्न समिति गठन गरिएको हो । 

समितिमा यातायात व्यवस्था सेवा कार्यालय, सडक डिभिजन कार्यालय, जिल्ला प्रहरी कार्यालय, जिल्ला ट्राफिक प्रहरी कार्यालय, जिल्लाका क्रिायशिल यातायात व्यवसायी तथा प्रा.लि.लाई सदस्यको रुपमा राखिएको छ । समितिले एक हप्ता भित्र प्रतिवेदन तयार पार्ने बताईएको छ । 

बैठकले तोकिएको भाडादर लिनुपर्ने, सिट क्षमता भन्दा बढी यात्रु नराख्ने, दोहोरो टिकट काट्ने समस्यालाई नियन्त्रण गर्ने निणर्य समेत गरेको छ । 

सहायक प्रमुख जिल्ला अधिकारी विनोद रेग्मीका अनुसार पार्किङ व्यवस्थापन, ट्राफिक नियमको कडाईका साथ पालना, मालबहाक सवारी साधनहरुले साँझ बिहान मात्र आगमन र प्रस्थान गर्ने, तोकिएको स्थानमा मात्र यात्रु ओराल्ने र चढाउने निणर्य आजको बैठकबाट गरिएको छ ।

बैठकमा जिल्लास्थित सुरक्षा निकायका प्रमुखहरु, सरोकारवाला सरकारी निकायका प्रतिनिधिहरु, विभिन्न राजनीतिक दलका प्रतिनिधिहरु, उद्योग वाणिज्य संघका अध्यक्ष, यातायात व्यवसायीहरु, पत्रकारहरु लगायतको उपस्थिति रहेको थियो ।