सोसल मिडिया
गत वर्ष जाजरकोट केन्द्रबिन्दु भएर गएको भूकम्पको कारण क्षती भएका रुकुम पश्चिमका केहि विद्यालयमा यस वर्ष नयाँ भवन निर्माण हुने भएका छन् । भूकम्पले भत्केका मध्य १२ वटा भवनहरु एसियाली विकास बैंक (एडिबी) को सहयोगमा निर्माण हुने भएका हुन् ।
शिक्षा विकास तथा समन्वय इकाईका सूचना अधिकारी डायमण्ड पुनका अनुसार आठबिसकोट नगरपालिकाका सात वटा, सानीभेरी गाउँपालिकाका तीन वटा र मुसीकोट नगरपालिकाका दुई वटा विद्यालयमा नयाँ भवन निर्माणको प्रक्रिया सुरु भएको छ ।
आठबिसकोट नगरपालिका वडा नम्वर ४ को ज्ञानोदय मावि, वडा नम्वर ६ को सुर्योदय मावि, वडा नम्वर ९ को बालकल्याण मावि, वडा नम्वर १० को जनता मावि, वडा नम्वर ११ को नेपाल राष्ट्रिय मावि र जनकल्याण मावि र वडा नम्वर १४ को आदर्श मावि एडिबीले निर्माण गर्ने भएको हो ।
त्यसैगरी सानीभेरी गाउँपालिका १ को शीतल मावि पक्रैया, भेरीदोभान मावि चाईनाबगर र वडा नम्वर ४ को सानीभेरी मावि बलिबाङ, मुसीकोट नगरपालिका १२ को जनकल्याण मावि काँशपोखरी र वडा नम्वर १३ मा रहेको महेन्द्र मावि चौतारा पनि यस चरणमा पुनर्निर्माण हुने भएका छन् ।
एडिबीले भवन निर्माणका लागि माग गरेको मापदण्ड, क्षती र आवश्यकताको आधारमा यी विद्यालयहरु छनौट भएका हुन् । छनौट भएका यी विद्यालयहरुको पुननिर्माणको लागि शिक्षा, विज्ञान तथा प्रविधि मन्त्रालयका सहसचिव बसन्त कोईरालाको नेतृत्वमा आएको एडिबीका प्रतिनिधिसहित सरोकारवाला निकायको टिमले स्थलगत निरीक्षण समेत गरेको छ ।
आठबिसकोट नगरपालिका प्रमुख रबि केसीका अनुसार आफ्नो पालिकामा दुई वटा विद्यालय भवन निर्माणका लागि टेण्डर समेत भईसकेको छ भने बाँकि पाँच वटाको केहि दिनमै टेण्डर गर्ने तयारी रहेको छ । नगर प्रमुख केसीले काम सुरु भएको १८ महिना भित्रै सात वटा विद्यालय निर्माण भईसक्ने बताउनुभयो ।
आठबिसकोट नगरपालिकाका निमित्त प्रमुख प्रशासकीय अधिकृत राजेश गौतमका अनुसार नक्शा पास र आवश्यक समन्वयको काम पालिकाबाट हुनेछ भने अन्य सबै काम एडिबीबाटै हुनेछ । एडिबीले आवश्यकताको आधारमा १२ देखी १८ वटा कक्षा कोठा रहेका भवनहरु बनाउन लागेको उहाँले जनाउनुभयो । यी सबै भवनहरुमा शौचालय र घेराबार समेत निर्माण गरिने गौतमले उल्लेख गर्नुभयो ।
शिक्षा विकास तथा समन्वय इकाईका अनुसार भूकम्पको कारण ४९ विद्यालय पूर्ण रुपमा क्षती भएका छन् भने २१३ वटा आंशिक क्षति भएका छन् । अधिकांश विद्यालयहरुमा अस्थायी सिकाई केन्द्र निर्माण गरेर पठनपाठन नियमित भईरहको छ भने कतिपय विद्यालयमा चर्किएकै भवनमा बालबालिका पठाउने गरिएको छ ।
