सोसल मिडिया
रुकुम पश्चिमको चौरजहारी नगरपालिकाले सञ्चालन गरेको आठौं मेयर कप तथा रनिङ शिल्डको उपाधी वडा नम्वर २ स्थित शीतल माध्यमिक विद्यालयले हात पारेको छ । शीतल माविले १६ स्वर्ण, सात रजत र दुई कास्य पदकसहित शिल्ड जितेको हो ।
चौरजहारी नगरपालिकाका निमित्त प्रमुख प्रशासकीय अधिकृत शेर प्रसाद ढकालका अनुसार वडा नम्वर ५ मा रहेको माध्यमिक विद्यालय खहरे ६ स्वर्ण, ६ रजत र चार कास्यपदक सहित दोश्रो भएको छ ।
त्यसैगरी वडा नम्वर ११ मा रहेको हिमालय मावि खोलागाउँ तीन स्वर्ण, ६ रजत र सात कास्यपदक सहित तृतीय स्थान ल्याउन सफल भएको छ ।
विद्यालय तहबाट नै खेल प्रतिभा प्रष्फुटनको अवसरका लागि हरेक वर्ष नगरपालिकाले मेयर कप तथा रनिङ शिल्ड खेलुकद प्रतियोगिता सञ्चालन गर्दै आएको जनाएको छ । गत मंसिर २८ गतेदेखि सञ्चालन भएको आठौं मेयर कप तथा रनिङ शिल्ड प्रतियोगिता पुस १ गते समापन भएको हो ।
