रुकुम पश्चिमको चौरजहारी नगरपालिकाका प्रथम नगर प्रमुख बिशाल शर्माले आफ्नो जन्मदिनको अवसरमा गरिब तथा असाहय परिवारका बिरामीलाई उपचारको लागि सहयोग गर्नुभएको छ ।

शर्माले आज परेको आफ्नो जन्मदिनको अवसरमा चौरजहारी नगरपालिका -२ निवासी असाहय तथा अपांगता हुनुभएकी चन्द्रा परियारको १४ वर्षीया छोरी बिना बिकको उपचारको लागि पाँच हजार रुपियाँ सहयोग गर्नुभएको हो । 

लडेर घाईते हुँदा बिनाको शरिरको तल्लो भागमा समस्या रहेको छ । चौरजहारी अस्पतालमा सामान्य उपचारपछि हिजो मात्रै थप उपचारको लागि उहाँलाई सुर्खेत रिफर गरिएको छ । 

उहाँको उपचारमा सहयोग होस् भनेर वडा नम्वर २ को कार्यालयमा बिरामीको आमा चन्द्रालाई सहयोग हस्तान्तरण गर्नुभएको वडा अध्यक्ष बिर बहादुर रानाले जानकारी दिनुभयो । शर्माले अन्य अवस्था र जन्मदिनको अवसरमा हरेक वर्ष समाजमा अत्यन्त कठिन जीवन बिताईरहेका गरिव, विपन्न, अशक्त तथा असहायहरुलाई सहयोग गर्दै आउनु भएको छ। 

जन्मदिनमा फजुल गर्ने चलनलाई तोड्दै शर्माले बिरामीको उपचारमा सहयोग गर्नुभएको हो ।