सोसल मिडिया
रुकुम पश्चिममा सार्वजनिक निकायबाट प्रवाह हुने सेवा प्रवाहका बिषयमा सार्वजनिक सुनुवाई कार्यक्रम सम्पन्न भएको छ ।
आईतबार जिल्ला प्रशासन कार्यालयको आयोजनामा सार्वजनिक सेवा प्रवाहका बिषयमा सहजिकरण, समन्वय र सार्वजनिक सुनुवाई कार्यक्रम सम्पन्न भएको हो ।
जिल्ला समन्वय समितिको प्राङगणमा भएको कार्यक्रममा सेवाग्राही तथा नागरिक समाजका अगुवाहरुले जिल्लाका विभिन्न सरकारी कार्यालयले प्रवाह गरेको सेवा, कार्यक्रम र बजेटका बिषयमा जिज्ञासा राखेका थिए । कार्यक्रममा प्रमुख जिल्ला अधिकारी कुलबहादुर जी.सी.ले सुशासन (व्यवस्थापन तथा संचालन) ऐन, २०६४ को दफा ३० बमोजिम सरकारी निकायले सार्वजनिक सुनुवाई सञ्चालन कार्यविधि तयार गरेर नियमित सुनुवाई गर्नुपर्ने बताउनुभयो ।
सरकारी गतिविधिलाई नागरिकमैत्री, पारदर्शी, सूचनामैत्री, सुशासनमैत्री बनाउन र नागरिकको सुझाव ग्रहण गर्न जिल्लाका सबै सार्वजनिक निकायलाई बोलाएर सार्वजनिक सुनुवाई गरिएको प्रजिअ जी.सी.ले उल्लेख गुर्नभयो । उहाँले कार्यालयले गरेका राम्रा कामहरुको सार्वजनिकिकरणसँगै जनस्तरबाट सुझाव ग्रहण गर्न सार्वजनिक सुनुवाई गर्नुपर्ने बताउनुभयो । उहाँले जिल्ला प्रशासन कार्यालयबाट सम्पादित कामहरुको प्रतिवदेन समेत प्रस्तुत गर्नुभएको थियो ।
कार्यक्रममा पत्रकार महेश केसीले सम्भवतः जिल्ला प्रशासन कार्यालयले पहिलोपटक सार्वजनिक सुनुवाई गरेको र अन्य कार्यालयले समेत यस कार्यक्रमलाई नियमित गर्नुपर्ने बताउनुभयो । उहाँले असार लाग्दा मात्रै विभिन्न योजनाहरुको अनुगमन गरिने परम्परा तोड्नुपर्ने र खलंगा बजारको ढल निकासलाई व्यवस्थापन गर्नुपर्नेमा जोड दिनुभयो ।
नागरिक अगुवा गोकर्ण खड्काले बजारमा सटर भन्दा बाहिर पसल थाप्ने गरेको, पेट्रोलियम पदार्थको खुला बिक्रि हुने गरेको, अपाङगता भएका व्यक्तिको परिचय पत्रको सवालमा गुनासो आएकोले यतातर्फ ध्यानाकर्षण हुनुपर्ने बताउनुभयो ।
मुसिकोट नगरपालिका १४ का विशाल बिष्टले सदरमुकाममा खानेपानीको समस्या बढ्दै गएको, मुसिकोट नगरपालिकामा नगर करार शिक्षक भर्ना गर्दा पैसामा मोलमोलाई हुने गरेको, सहिद मैदानको धारा मासेको भन्दै मुसिकोट नगरपालिकालाई प्रश्न गर्नुभएको थियो ।
पत्रकार अमरराज पुनले जिल्लामा केहि कार्यालयले मात्र नाम मात्रको सार्वजनिक सुनुवाई गर्ने गरेको, मालपोत कार्यालयमा घुस बिना काममा ढिलाई हुने गरेको गुनासो गर्नुभयो ।
युवा नेता यमराज डाँगीले सदरमुकामको मुख्य बजारमा फोहोर व्यवस्थापन हुन नसकेको, जिल्लाको जेठो बिद्यालयका रुपमा रहेको त्रिभुवन जनता माविमा चर्को शुल्क उठाउने गरेको बिषयमा प्रश्न उठाउनुभएको थियो ।
त्यसैगरी उद्योण वाणिज्य संघका उपाध्यक्ष दलबहादुर खड्काले स्थानीय सरकारले खर्चका नाममा लागत बढाएर योजना बनाउने गरेको, बजारमा फोहोर बढेको, पर्यटकिय सम्भावना हुँदाहुँदै कामहरु हुन नसकेको, मुसिकोट नगरपालिकाका कार्यपालिका सदस्यले महिनौसम्म कार्यपालिकाका निर्णय बारेमा जानकारी पाउन नसकेको बिषयमा जिज्ञासा राख्नुभएको थियो ।
त्यसैगरी मुसिकोट नगरपालिका २ का रमेश खड्काले बजारमा प्लाष्टिकको प्रयोग जथाभावि हुने गरेको, स्वच्छता र खानेपानीको क्षेत्रमा प्रभावकारी काम हुन नसकेको बिषयमा गुनासो राख्नुभयो ।
सहभागिका जिज्ञासाहरुको जवाफ मुसिकोट नगरपालिका प्रमुख महेन्द्र केसी, प्रमुख जिल्ला अधिकारी कुलबहादुर जी.सी. लगायत सम्बन्धित कार्यालयका प्रमुखहरुले दिनुभएको थियो ।
सहायक प्रमुख जिल्ला अधिकारी विनोद रेग्मीले सञ्चालन गर्नुभएको उक्त कार्यक्रममा मुसिकोट नगरपालिका प्रमुख महेन्द्र केसी, चौरजहारी नगरपालिकाका उप प्रमुख ईश्वरी बिएम, सानीभेरी गाउँपालिकाका उपाध्यक्ष कमला रोका, प्रमुख जिल्ला अधिकारी कुल बहादुर जीसि, नेपाली काँग्रेसका उपसभापति हर्कसिं खत्री, नेकपा एमालेका जिल्ला अध्यक्ष नन्दराम देवकोटा, नेकपा माओवादी केन्द्रका टेकबहादुर ओली, सुरक्षा निकायका प्रमुखहरु, रुकुम उद्योग वाणिज्य संघका अध्यक्ष पलबहादुर खड्का, गैर सरकारी संस्था महासंघका अध्यक्ष भिमराज ओली लगायत जिल्लास्थित विभिन्न सरकारी कार्यालयका प्रमुख एवम् प्रतिनिधिहरुको उपस्थिति रहेको थियो ।
