सोसल मिडिया
रुकुम पश्चिमको चौरजहारीमा नेपाली कांग्रेसका तत्कालिन जिल्ला सभापति सहिद हरिभक्त ओलीको २६औं स्मृति दिवस मनाईएको छ ।
जिल्ला विकास समितिका पूर्व सभापति समेत रहनुभएका नेता ओलीको तत्कालिन माओवादीद्वारा २०५५ माघ १ गते चौरजहारी नगरपालिका २ स्थित बजारमा हत्या गरिएको थियो ।
स्व. ओलीको स्मृति दिवसको अवसरमा मंगलबार नेपाली कांग्रेस चौरजहारी नगर समितिले २६औं स्मृति सभा सम्पन्न गरेको छ । सभामा बोल्ने अधिकांश कांग्रेस नेताहरुले सहिद हरिभक्त ओलीको हत्या भएतापनि उहाँको विचारको हत्या हुन नसक्ने र उहाँ अमर रहेको चर्चा गरेका छन् ।
स्मृति सभामा नेपाली कांग्रेसका कर्णाली प्रदेश समिति सदस्य सीता ओलीले माओवादीले जनयुद्धका नाममा गरेको अपराधको श्रृंखला कालोदिनको रुपमा रहेको उल्लेख गर्नुभयो । उहाँँले मान्छे मारे पनि विचार मार्न नसकिने बताउनुभयो ।
कार्यक्रममा कांग्रेसका जिल्ला उपसभापति सुरतजंग मल्लले हरिभक्त सबैको प्यारो नेता भएको र उहाँको सामाजिक र राजनैतिक योगदान अमूल्य रहेको बताउनुभयो । यसैगरी जिल्ला सचिव परमेश्वर भण्डारीले हरिभक्तले सिकाएको बाटोमा हिड्न आम कांग्रेस कार्यकर्तालाई आग्रह गर्नुभयो । उहाँले हत्या, हिंसाको राजनीतिले मुलुकको हित नहुने बताउनुभयो ।
जिल्ला सचिव तारक बहादुर शाहीले मुलुकमा कांग्रेसको विकल्पमा कांग्रेस र लोकतन्त्रको विकल्प लोकतन्त्र नै भएको उल्लेख गर्नुभयो । उहाँले फरक राजनीतिक आस्थाकै कारण हत्याको बाटो अपनाएको माओवादी कांग्रेसकै औला समाएर लोकतन्त्रको बाटोमा स्मरण गर्नुभयो ।
कार्यक्रममा नेपाली कांग्रेसका महाधिवेशन प्रतिनिधि खड्क बहादुर डाँगीले फरक आस्थाको लोकप्रियता देखेर मानव हत्या गरेको माओवादीको ओरालो यात्रा सुरु भएको जनाउनुभयो ।
युवा नेता डाँगीले माओले पुजिँवादलाई बाघसँग तुलना गरेको, माक्सले पुजिँवाद मरानासन्न अवस्थामा छ भनेर उल्लेख गरेको सन्दर्भ जोड्दै नेपालका कम्युनिष्टहरु त्यहिँ पुजिँवादको दलदलमा फसेको बताउनुभयो । उहाँले भ्रष्टाचारको दलदलमा फसेका कम्युनिष्टहरु पतनको लाईनमा गएको उल्लेख गर्नुभयो ।
डाँगीले वर्तमान व्यवस्थाको विकल्प थप उन्नत लोकतान्त्रिक व्यवस्था रहेको जनाउँदै नोपलमा अधिनायकवाद र निरंकुशता दुवै अन्त्य हुने बताउनुभयो । गलत बाटो र सोचबाट राजनीतिमा आएकाहरुले आफुलाई नायक ठान्नु झुठको खेती भएको उहाँको भनाई छ ।
क्षेत्रिय सभापति भद्रबहादुर बिष्टले सहिदको सपना साकार पारेरै छोड्ने बताउनुभयो । उहाँले लोकप्रिय नेता र अभिभावक गुमाएको पीडा ताजै रहेको र उहाँको विचारको बाटोमा हिडिरहेको उल्लेख गर्नुभयो ।
कार्यक्रममा नेपाली कांग्रेसका जिल्ला सदस्य अमर सिंह खड्काले विकासप्रेमी नेताको हत्याबाट समाजको विकासको योजना नै लथालिंग हुन पुगेको बताउनुभयो । उहाँले स्वर्गीय सहिद हरिभक्तको विचार सदा अमर रहेको उल्लेख गर्नुभयो ।
कार्यक्रममा नेपाली कांग्रेस चौरजहारीका नगर सभापति प्रेमबहादुर ओलीले हरिभक्त लगायतका विर सहिदको सपना साकार पार्न कांग्रेस एकढिक्का भएर लाग्नुपर्नेमा जोड दिनुभयो । सदिह हरिभक्तको स्मृति गेट निर्माण, भवन निर्माण गरेर त्यहि छहारीमा कांग्रेसको विचार विमर्श गर्न अत्यावश्यक रहेको उहाँले बताउनुभयो । हरिभक्तको योगदान र लोकप्रियताबाट अत्तालिएकाहरुले उहाँको हत्या गरेतापनि उहाँको विचारको हत्या नहुने उहाँले उल्लेख गर्नुभयो ।
कार्यक्रममा सहभागीहरुलाई स्वागत गर्नुहुँदै नेपाली कांग्रेसका जिल्ला सदस्य यदु कुमार आचार्यले माघ १ लाई रुकुमेली जनता र नेपाली कांग्रेसले कालो दिनको रुपमा लिएको बताउनुभयो । उहाँले सयौ विचारकहरु कांग्रेसको झण्डाभित्र जुर्मुराएकोले सुन्दर लोकतन्त्रको अनूभुति जनताले गर्न पाउनेमा आशावादी रहेको उल्लेख गर्नुभयो ।
कार्यक्रममा बोल्ने अधिकांश वक्ताहरुले रुकुममा कांग्रेस बलियो बन्दै गएको र माओवादीको ओरालो यात्रा सुरु भएको बताएका छन् । चौरजहारीस्थित पार्टी कार्यालयमा भएको स्मृति सभाको अध्यक्षता नगर सभापति प्रेम बहादुर ओलीको गर्नुभएको थियो भने नगर समितिका सहसचिव गोपाल लामिछानेले सञ्चालन गर्नुभएको थियो ।
