चौरजहारी अस्पतालमा बालबालिकाको निःशुल्क उपचार

रुकुम पश्चिमको चौरजहारी अस्पतालमा बालबालिकाहरुको उपचार निःशुल्क हुने गरेको छ । अस्पतालले विगत देखि नै अस्पतालमा भर्ना भएर उपचार गराईरहेका पाँच वर्षमूनिका बालबालिका र ‘साथी सेवा’ मार्फत १६ वर्षमूनिका बालबालिकाको निःशुल्क उपचार गर्ने गरेको छ । 

अस्पताल प्रशासक डिलबहादुर गिरीका अनुसार पाँच वर्षमूनिका बालबालिका अस्पताल भर्ना भएपछि लाग्ने सम्पूर्ण औषधि उपचार खर्चका साथै कुरुवा समेतको खाना र बस्ने व्यवस्था अस्पतालले गर्ने गरेको छ । यस कार्यवापत बार्षिक करिब ९० लाख रुपियाँ खर्च हुने गरेको छ भने दुई हजार बालबालिकाले उपचार पाउने गरेका छन् ।

प्रशासक गिरीका अनुसार अस्पतालमा निमोनिया, टाईफाईड, झाडापखाला, श्वासप्रश्वास, हड्डी भाँचिएका लगायतका समस्या भएका बालबालिकालाई भर्ना गरेर उपचार गर्ने गरिएको छ । यसैगरी अस्पतालले विगत सात वर्षदेखि ‘साथी सेवा’ कार्यक्रम समेत सञ्चालन गरिरहेको छ ।

यस कार्यक्रम अन्तर्गत १६ वर्षमूनिका मुटुका रोगी, जन्मजात अपाङ्गता भएका, जलनको समस्या भएका बालबालिकाको उपचार हुने गरेको छ । अस्पताल प्रशासक गिरीले चौरजहारीमै हुने जाँच, उपचार र थप उपचारको लागि रिफर भएमा समेत लाग्ने सम्पूर्ण खर्च बिरामीले तिर्नु पर्दैन । सबै खर्च अस्पतालले नै बेहोर्ने गरेको छ । हरेक वर्ष ४० देखि ४५ जना बालबालिकाले यस कार्यक्रम मार्फत सेवा लिने गरेको अस्पतालले जनाएको छ । 

‘साथी सेवा’ मार्फत छोरीको उपचार गराउनु भएका चौरजहारी नगरपालिका –८ सोतीखोलाका डिल्ली शाहीले अस्पताल र उक्त कार्यक्रमले छोरीको उपचार निःशुल्क गरिदिएको बताउनुभयो । उहाँको नौ वर्षीया छोरी सुमिना शाहीलाई मुटुमा समस्या देखापरेको थियो । शाहीका अनुसार छोरीको मुटुमा प्वाल परेको र एउटा भल्भ सानो रहेको समस्या थियो ।

अस्पतालले साथी सेवा मार्फत सबै उपचार गरिदिएको छ । सर्वसाधारणका लागि यो ठुलो राहत हो । उहाँका अनुसार करिब दश लाख रुपियाँ खर्च लाग्ने अवस्था रहेकोमा उपचारको सम्पूर्ण खर्च निःशुल्क भएको हो । शाहीले शहीद गंगालाल राष्ट्रिय हृदय केन्द्रमा छोरीको अप्रेशन भएको र अहिले स्वास्थ्य अवस्था राम्रो रहेको जनाउनुभयो ।

मानव विकास तथा सामुदायिक सेवाद्वारा सञ्चालित यस अस्पतालले सुत्केरी, गरीव तथा असाहायका लागि समेत निःशुल्क सञ्चालन गरिरहेको छ । यस अस्पतालबाट बार्षिक एक लाख बढीले उपचार सेवा लिने गरेका छन् ।