एउटै घाटमा जलिरहे प्रेमिल जोडी, रोईरहे मलामी !  

आफ्नो प्रेम सम्बन्धलाई विवाहमा परिणत गर्न एकसाथ भएको चार दिनमै प्राण त्यागेका एक जोडीको शवको अन्त्येष्टि गरिएको छ । 

रुकुम पश्चिमको त्रिवेणी गाउँपालिका ४ खुम्चेरीका १९ वर्षीय लोकेन्द्र खड्का र सोहि गाउँपालिकाको वडा नम्वर ६ की १९ वर्षीया सपना पुन मगरको आईतबार वडा नम्वर २ स्थित घाटमा अन्त्येष्टि गरिएको हो । 

हिजो शनिबार लोकेन्द्रको घरमा उनीहरु मृत अवस्थामा फेला परेका थिए । चार दिन अघि माघ ८ गते लोकेन्द्रले सपनालाई विवाहको लागि भगाएर घर लिएका थिए । त्यो बेला लोकेन्द्रको घरमा कोही थिएनन् ।

लोकेन्द्रको आमा बिरामी भएपछि बुवाको साथमा उपचारको लागि नेपालगञ्ज जानुभएको थियो । घटनापछि लोकेन्द्रका बुवाआमा शनिबार बेलुका घर फर्कनु भएको थियो । लोकेन्द्र घरको एकमात्र छोरा हुन् । उनको एक बहिनी छिन् । काठमाडौमा अध्ययनर गर्ने बहिनी दाईको खबरपछि नेपालगञ्जहुँदै घर आएकीछिन् । 

जिल्ला अस्पताल सल्लेमा दुवैको शवको पोष्टमार्टमपछि आजै अन्त्येष्टि गरिएको छ । घटनापछि शोकमग्न सिंगो गाउँ एउटै घाटमा दुई शव जलिरहदाँ थप बिक्षिप्त बनेको छ । 

मलाम आएका एक हजार बढी मलामीहरुको आँखा ओभानो देखिएन । कलिलो उमेरमा भएको दुःखद घटनाले सबैलाई रुवाएको छ । 

सपना घरकी कान्छी छोरी हुन् । उनका एक दाई र दुई दिदि हुनुहुन्छ । विवाह गर्न भागेकी छोरीको मृत्युको खबरपछि सपनाको बुवाआमा, दाई, दिदि र आफन्तहरु मर्माहत हुनुहुन्छ ।

हत्या कि आत्महत्या ?

प्रेमिल जोडी एउटै कोठामा मृत भेटिदा हत्या हो कि आत्महत्या भनेर यकिन हुन सकेको छैन । आफन्तहरुले घटना रहस्यमै रहेको भन्दै पीडा पोखेका छन् । 

जिल्ला प्रहरी कार्यालय रुकुम पश्चिमका प्रहरी नायब उपरीक्षक (डिएसपी) प्रमेश बिष्टले अहिले नै हत्या कि आत्महत्या भनेर यकिन गर्न नसकिने बताउनुभयो । उहाँका अनुसार पोष्टमार्टम रिपोर्टपछि मात्रै खास कुरा खुल्ने बताउनुभयो ।

लोकेन्द्रको अस्थायी टहराभित्र लोकेन्द्र झुन्डिएको अवस्थामा र सपना भुईमा उत्तानो रहेको अवस्थामा मृत फेला परेका थिए । प्रहरीले घटनास्थलमा अन्य कुनै शंकास्पद प्रमाणहरु पनि नरहेको जनाएको छ । घटनाको अनुसन्धान भने भईरहेको छ । 

यो पनि हेर्नुहोस् :-

रुकुममा विवाह गर्न भगाएको चार दिनमै एक जोडि मृत अवस्थामा फेला