रुकुम पश्चिमका दश हजार बढी छात्रालाई एचपिभी खोप लगाइने 

रुकुम पश्चिमका दश हजार बढी छात्रालाई पाठेघरको मुखको क्यान्सर गराउने विरुद्धको एच. पि. भी. खोप लगाइने भएको छ । 

यहि माघ २२ गते देखि सुरु हुने एच. पि. भी. खोप अभियान अन्तर्गत जिल्लाका दश हजार १९३ छात्रालाई खोप लगाइने भएको हो । 

स्वास्थ्य सेवा कार्यालय रुकुम पश्चिमका सूचना अधिकारी जनस्वास्थ्य अधिकृत कालीबहादुर ओलीले विद्यालयमा गएर अध्ययन गर्ने कक्षा ६ देखि १० सम्मका छात्रा र विद्यालय नजाने १० देखि १४ वर्ष उमेरका किशोरीलाई एच. पि. भी. खोप लगाइने बताउनुभयो । 

जसअन्तर्गत कक्षा ६ देखि १० सम्मका नौ हजार ९६० छात्रा र विद्यालय नजाने १० देखि १४ वर्ष उमेरका २३३ किशोरीलाई खोप लगाइने छ । 

जिल्लाको मुसिकोट नगरपालिकाका २ हजार १८० जना, आठबिसकोट  नगरपालिकाका २ हजार १७९ जना र चौरजहारी नगरपालिकाका १ हजार ५३१ छात्रा तथा किशोरीलाई एच. पि. भी. खोप दिइने भएको छ । 

यसैगरी सानीभेरी गाउँपालिकाका १ हजार ५५९, त्रिवेणी गाउँपालिकाका १ हजार २७९ र बाँफिकोट गाउँपालिकाका १ हजार २३२ छात्रा तथा किशोरीलाई उक्त खोप लगाउने योजना रहेको ओलीले जानकारी दिनुभयो ।  एच. पि. भी. खोप अभियानका लागि २०७ वटा विद्यालयमा खोप केन्द्र सञ्चालन गरिने भएको छ । अभियानलाई सफल पार्न जिल्लाभर २१२ जना स्वास्थ्यकर्मी र ४४४ जना स्वयंसेवक परिचालन हुने भएका छन् । 

यही माघ २२ गतेदेखि फागुन ६ गतेसम्म सञ्चालन हुने एच. पि. भी. खोप अभियानमा छुटेकालाई अभियानको अन्तिम दिन स्वास्थ्य संस्थाबाट समेत खोप दिइने स्वास्थ्य सेवा कार्यालयले बताएको छ ।

स्वास्थ्य सेवा कार्यालय प्रमुख महेश चौलागाईले राष्टिय खोप कार्यक्रम अन्तर्गत्त नै जिल्लामा यो अभियान सञ्चालन गर्न थालेको बताउनुभयो । उहाँले पाठेघरको मुखको क्यान्सर खोपबाट रोकथाम गर्न सकिने उल्लेख गर्नुभयो । सुरुकै अवस्थामा यो रोगको पहिचान भएमा उपचार गरेर निको ुहने उहाँको भनाई छ । एच. पि. भी. खोप निशुल्क, सुरक्षित हुनका साथै जीवन रक्षा गर्ने समेत उहाँले बताउनुभयो ।