आठबिसकोटमा नवनिर्मित दुई विद्यालय भवन उद्घाटन

रुकुम पश्चिमको आठबिसकोटमा नवनिर्मित दुई वटा विद्यालय भवन उद्घाटन गरिएको छ । आठबिसकोट नगरपालिका वडा नम्वर ७ मा रहेको जनज्योती आधारभूत विद्यालय डाँफे र भानुभक्त आधारभूत विद्यालय औलीगाउँमा निर्मित भवनको एकैदिन उद्घाटन गरिएको हो । 

नगर प्रमुख रबि केसीले नवनिर्मित भवनको उद्घाटन गर्नुभएको हो । उक्त अवसरमा नगर प्रमुख केसीले भवन निर्माणपछि पठनपाठनमा सहजता आउने बताउनुभयो । भौतिक पुर्वाधार अभावमा रहेका विद्यालयमा चार कोठे भवन निर्माण भएकोले गुणस्तरिय शैक्षिक वातावरणमा टेवा पुग्ने उहाँले विश्वास व्यक्त गर्नुभयो । 

आठबिसकोट नगरपालिकाको योजना अन्तर्गत राष्ट्रपति शैक्षिक सुधार कार्यक्रमबाट विद्यालय भवनहरु बनाईएको हो । चार कोठे भवनका लागि ७३/७३ लाख लगानी रहेको बताईएको छ । 

२०८० जेठ महिनामा शिलान्यास गरिएका यी भवनहरु निर्माण सम्पन्न पश्चात भवन अभावमा झेल्दै आएका कठिनाईहरुको गुनासो हट्ने वडा अध्यक्ष अमृत बुढाले बताउनुभयो । यसअघि विद्यालय भवन अपुग हुँदा बालबालिकालाई असजिलो तरिकाले पठनपाठन भैरहेको थियो । 

वडा अध्यक्ष बुढाले वडा कार्यालयले नगरपालिकामा अनुरोधपछि राष्ट्रपति शैक्षिक सुधार कार्यक्रम मार्फत भवन बनेको जानकारी दिनुभयो । उहाँले भवन बनेपछि अब गुणस्तरिय शिक्षामा जोड दिन विद्यालय प्रशासन र शिक्षकहरुलाई आग्रह गर्नुभयो ।