रुकुमका विभिन्न विद्यालयमा सरस्वती पूजा, बालबालिकालाई अक्षरारम्भ 

आज माघ शुक्ल पञ्चमी । हिन्दू वैदिक परम्पराको वसन्तपञ्चमी व्रत अर्थात सरस्वती पूजा। मुख्यतः विद्याकी अधिष्ठात्री देवी सरस्वतीको पूजन परम्परासँग जोडिएको यो पर्वमा साना–साना नानीहरुलाई अक्षरारम्भ गराइने परम्परा छ । 

आज रुकुम पश्चिमका विभिन्न विद्यालयहरुका साथै सरस्वतीको मन्दिरमा पनि सरस्वतीको मन्दिरमा सरस्वतीको पूजा गर्न विभिन्न विद्यालयका विद्यार्थीदेखि साना साना नानीहरु पनि भेला भएका छन् । प्रत्येक वर्ष माघ शुक्ल पञ्चमीकै दिन मनाइने ‘श्रीपञ्चमी’ पर्व आज विद्याकी अधिष्ठात्री देवी सरस्वतीको देशभर निष्ठापूर्वक पूजा–आराधना गरी मनाइँदैछ ।

चन्द्रमाजस्तो गोरो वर्ण भएकी तथा हातमा वीणा र पुस्तक लिएकी विद्याकी देवी सरस्वतीलाई भक्तजनहरूले भारती, शारदा, हंसवाहिनी, जगन्माता, वागीश्वरी, कौमारी, वरदायिनी, बुद्धिदात्री, ब्रह्मचारिणी, चन्द्रघण्टा र भुवनेश्वरीजस्ता नामले पुकार्छन् ।

विद्या र सिर्जनाकी देवी भएकाले विशेषगरी साहित्यकार, कलाकार, पत्रकार, शिक्षक र विद्यार्थी आआफ्ना कला–साधनाका वस्तु कलम, कापी, कुची र वाद्ययन्त्रलाई सरस्वतीका रूपमा पूजा–आराधना गर्छन् । सरस्वतीलाई तान्त्रिकहरूले तन्त्र सिद्धिका लागि तारादेवीका रूपमा मान्छन् ।

सूर्य उत्तरतिर लागी दिन लामो हुने र वसन्त ऋतु प्रारम्भ हुने विश्वासका साथ आजको दिनलाई ‘वसन्त पञ्चमी’ पनि भनिन्छ । ऋग्वेदमा वाग्देवीका नामले प्रसिद्धि पाएकी ब्रह्माकी अर्धाङ्गिनी ब्रह्मायणीको पूजा उपासनाले सबै प्रकारको ज्ञान, सिद्धि र सद्बुद्धि प्राप्त हुने उल्लेख छ । यसैकारणले सरस्वती पूजालाई ठूलो महत्व दिइन्छ । आजका दिन सरस्वतीको पूजागरी विद्यारम्भ गरेमा सर्वसिद्धि प्राप्त हुन्छ भन्ने विश्वास छ ।

यहि विश्वासका साथ जिल्लाको विभिन्न स्थानमा रहेका सामुदायिक तथा संस्थागत विद्यालयहरुले सरस्वती पूजाका साथै अक्षरारम्भ कार्यक्रम सम्पन्न गरेका छन् । यस अवसरमा सरस्वतीको पूजा गर्नुका साथै विभिन्न साँस्कृतिक प्रस्तुतीहरु प्रदर्शन गरेका छन् ।