स्वाधीनतामा बाँचिरहेको प्यारो देश नेपाल

• दिवाकर शर्मा

एउटा सीमा रेखाले बन्दित ठूलो जमिनभित्र पर्ने भाग नै एउटा देश हो। जुन आआफ्नो देश भनेर भन्ने गर्दछौं। उसो त यो पृथ्वी सबैको साझा हो। सायद यो पृथ्वीमा जानका लागि भिजा पासपोर्ट लाग्दैन होला। घेराभित्र बन्दित हुने प्रक्रिया आआफ्ना देशहरुले ल्याएका हुन् ।

संसारमा दुईटा (महिला र पुरुष) मात्रै जात छन् भनेजस्तै संसारमा एउटै मात्र जमिन छ। जो हो पृथ्वी। यो पनि आफ्नो पहिचानका लागि एउटा घेराभित्र बन्दित भएर देश बन्नुपर्दछ। तिनै देशहरूमध्येको एक लाख ४७ हजार १८१ वर्ग किलोमिटर क्षेत्रफलमा सजिएको एउटा देश हो नेपाल । सगरमाथाको देश, शान्तीको देश, प्राकृतिक सुन्दरताले भरिपूर्ण देश, अनेकतामाथि एकता भएको देश, संस्कार र संस्कृतिले धनी देश ।

नेपाल निकै लोकप्रिय छ, विश्वभर चिरपरिचित छ। नेपाल परिचित हुनका लागि यहाँ विश्वभर कहि नभएका तर यहाँ भएका चिज वस्तुहरू छन्। जसले गर्दा विश्वभर प्रख्यात छ। हिमाल, पहाड र तराईको बनोटमा बनेको हाम्रो नेपाल निकै सुन्दर छ। नेपालभित्रका जडीबुटीहरू औषधिको रूपमा प्रयोग हुन्छन् । जुन निकै लाभदायक र उपयुक्त छन् । यहाँको पानी अमृत जस्तै छ। जुन पानीलाई कुनै शुद्धता गर्नु पर्दैन ।

हराभरा वनजङ्गल भित्र पनि ८६४ भन्दा बढी अनेकौं प्रजातिका वनस्पतिहरू छन्, यहाँका मुख्य आकर्षक वन जङ्गलहरू हुन्। तिनै वनजङ्गलभित्र ९०० भन्दा बढी जङ्गली जनावरहरू, १३६ जातभन्दा बढी स्तनधारीहरू हाम्रै नेपालमा पाउँछन्। वर्षका ३६५ दिनै विभिन्न चाड पर्वहरू, फरक ठाउँमा फरक रितिरिवाज, फरक ठाउँमा फरक भाषा भेष, फरक ठाउँमा फरक चालचलन अनि ८ हजार ८४८ मिटर अग्लो सगरमाथा, ८ हजार भन्दा माथिका अग्ला ती हिमालहरू, सर्वाधिक शक्तिशाली पशुपतिनाथ, पाथिभरा, निरन्तर बलिरहने ज्वाला, तातोपानी, चिसोपानी विभिन्न मठ मन्दिर हरेक ठाउँको फरक बालीनाली, ७७ जिल्लाहरूको आफ्नै फरक रूप रङ्ग, जीवनशैली, जिल्लै पिच्छे मठमन्दिर, नदीनाला, तालतलैया, छाङ्गा, छहरा, फेवा र रारा, अनि दुल्लु देखि विजयपुरसम्मका सांस्कृतिक सम्पदा ब्रह्माण्डमा अन्त कहिँ छैनन् । त्यसैले साक्षात स्वर्गको एक टुक्रा हो प्यारो नेपाल ।

फरक फरक स्थानको भाषा र भेष, हावापानी, रिति संस्कृति, सांस्कृतिक पहिचान, नेपाली पोशाक गर्वलायक सम्पदा हुन् । सगरमाथा, पशुपतिनाथ लगायतका मठमन्दिर, शक्तिले भरिपूर्ण भूमि माता सीताको जन्म देश, अरुनिको अनि गौतम बुद्धको जन्म देश, बाल्मिकी लगायत विभिन्न ऋषिमुनिहरूले तपस्या गरेको ठाउँ, अङ्ग्रेजहरुसँगको लडाईमान नेपालीपनको बहादुरीपन । चिसो न गर्मी ठिक्कको हावापानी ।

मल्ल, किराँत, लिच्छविकाल अनि बाइसे र चौबीसे राज्यहरू हुँदै राजाहरूको शासनकाल, जहाँनिया राणा शासन, पञ्चायत, जनयुद्ध, गणतन्त्र , लोकतन्त्र र संघीयता लगायतका अनेक कालखण्ड झेल्दै, फेर्दै सधैँ स्वाधीनतामा बाँचिरहेको छ मेरो प्यारो देश नेपाल । हाम्रो देश नेपाल ।

- बनगाड कुपिन्डे नगरपालिका -२, सल्यान