रुकुम पश्चिमका चार पालिकामा ‘जनयुद्ध दिवस’को अवसरमा सार्वजनिक बिदा

रुकुम पश्चिमको चार वटा पालिकाले भोलि फागुन १ गते ‘जनयुद्ध दिवस’को अवसरमा सार्वजनिक बिदा दिएका छन् । 

जिल्लाको बाँफिकोट, सानीभेरी र त्रिवेणी गाँपालिका र चौरजहारी नगरपालिकाले सूचना प्रकाशन गरेर ‘जनयुद्ध दिवस’ लाई भव्यताका साथ मनाउन सार्वजनिक बिदा दिएका हुन् । 

‘जनयुद्ध दिवस’को अवसरमा विभिन्न कार्यक्रम सञ्चालन गरेर मनाउन पालिकास्थित सम्पूर्ण सरकारी कार्यालयहरू र शिक्षण संस्थाहरु बन्द गर्ने निर्णय भएको पालिकाको सूचना उल्लेख गरिएको छ । सानीभेरी गाउँपालिकाले ‘जनयुद्ध दिवस’को अवसर पारी सातौँ मौराखारा राष्ट्रिय गुरिल्ला म्याराथन समेत आयोजना गरेको छ ।

जिल्लाका मुसिकोट र आठबिसकोट नगपालिकाले भने यो समाचार तयार पार्दा सम्म बिदाका बारेमा केही खुलाएका छैनन् ।

बिदा नगर्न परिपत्र

यसै बिच नेपाली कांग्रेस रुकुम पश्चिमले फागुन १ गते जनयुद्ध दिवस भनेर बिदा नदिन पार्टीबाट निर्वाचित पालिका प्रमुख र वडा अध्यक्षहरुलाई परिपत्र गरेको छ । 

पार्टी सभापति प्रेमप्रकाश ओलीले एक परिपत्र जारी गर्नुहुँदै नेपालको संविधान, सर्वोच्च अदालत र संवैधानिक अदालतको आदेश विपरित केहि पालिकाहरुले जनयुद्ध दिवस भन्दै सार्वजनिक बिदा दिएर कानूनको खिल्ली उडाएको उल्लेख छ । 

परिपत्रमा पालिका प्रमुख र वडा अध्यक्षहरुलाई सार्वजनिक बिदा नहेको भनि सम्बन्धित वडा र पालिकाबाट सूचना प्रवाह गर्न परिपत्र गरिएको छ ।